Lino Saulo wafwile, Devedi u wizile aya umwene. Wali ni myaka 30. Lino papisile imyaka imwi kufuma pano wayelile umwene, uwanda umwi usiku, ala ali apipaala ili sano lyakwe, waweni umwanaci umusuma. Devedi wizile amanya ukuti izina lyakwe a Batisyeba nu kuti iya wakwe wali umusilika wi izina lyakuti Uliya. Fwandi waneenyile aakuya ama Batisyeba ukwi isano lyakwe. Devedi waizi na Batisyeba nupya Batisyeba wakweti inda. Lyene Devedi wezizye ukufisilizya vino wacisile. Waneenyile umukalamba wayasilika ukuti aike Uliya pa nkoleelo lino yali mu ulwi lyene asilika asyala yaye pa cisila. Pa cisila cakuti Uliya wakomwa umu ulwi, Devedi watwazile Batisyeba.

Lelo Yeova waweni iviipe vyonsi ivyacitike. Uzye wali nu kucita uli? Yeova watumile kasesema Natani kuli Devedi. Natani waneenyile Devedi ati: ‘Umuntu umwi umukama wakweti ifwele izingi, lelo umupiina wene wakweti sile akafwele konga kano watemilwe sana. Nomba umukama wiyo, watoozile kafwele konga kano umupiina wakweti.’ Devedi wasosile sana nupya walanzile ukuti: ‘Umukama wiyo alinzile ukufwa!’ Natani nawe waneenyile Devedi ati: ‘Wewe kwene uli muntu mukama.’ Devedi uvwile sana uyi nupya wanenyile Natani ati: ‘Injembukila Yeova.’ Uluyembu luu lwaleesile sana intazi pali Devedi nu ulupwa lwakwe. Yeova wafulwile Devedi nomba walesile ukuti atwalilile ukuya nu umi pano wali na ucisinka nupya wali umuicefye.

Devedi walondanga ukukuulila Yeova itempele, nomba Yeova wasoolwile Solomoni umwana wakwe Devedi ukuti aliwe akuule  itempele. Devedi watandike ukupekanyizizya Solomoni ivyakuomvya nupya walanzile ati: ‘Itempele lyakwe Yeova lilinzile ukuya ilya lulumbi. Solomoni acili umwance, nomba ndamwazwa ukupitila mu kumupekanyizizya ivintu ivyakuomvya.’ Devedi wasangwilile impiya zyakwe izingi zya kuomvya uku mulimo wa kukuula. Nupya walonzile na aomvi aamanyile imilimo. Wakolonganike goldi na siuva nu kuleta imiti ya mikedali kufuma ku Tuli nu ku Sidoni. Lino Devedi wali umupiipi nu kufwa, wapeezile Solomoni ivyakulondela pa kukuula itempele. Watile: ‘Yeova waneenyile ukuti nkulembele ivintu vii. Yeova alakwazwa. Utuvwa intete. Ukome nu kuipekanya ukuomba umulimo.’