Tá ni̱xi̱ʼi̱ ta̱ Saúl, ta̱ David ni̱xa̱a̱ra ku̱ura rey tá ndíka̱a̱ra 30 ku̱i̱ya̱. Ku̱a̱ʼá ku̱i̱ya̱ ni̱ya̱ʼa soo iin ñu̱ú, tá níndichira xi̱ní veʼera xi̱nira iin ñaʼá ñá liviní. Ta̱ David ni̱nda̱ka̱tu̱ʼunra xa̱ʼañá, ta na̱kunda̱a̱-inira ña̱ naníñá Bat-seba ta ñá síʼí ta̱ soldado Urías kúúña. Tasaá ni̱ka̱ʼa̱nra ná ku̱ʼu̱nna kiʼinnañá kixiñá nu̱úra, tasaá ni̱ki̱si̱ra xíʼinñá ta ni̱ke̱e se̱ʼeñá. Ta̱yóʼo xi̱kuni̱ra chi̱se̱ʼéra ña̱ ke̱ʼéra. Xa̱ʼa ña̱yóʼo ni̱ka̱ʼa̱nra xíʼin ta̱ ndísochíñu xíʼin na̱ soldado ná chinúura ta̱ Urías chí nu̱ú tá ná ku̱ʼu̱nna kanitáʼanna ta ná ndakoo miínara. Kán ni̱xi̱ʼi̱ ta̱ Urías, tándi̱ʼi ti̱ndaʼa̱ ta̱ David xíʼin ñá Bat-seba.

Jehová xi̱nira ña̱yóʼo. ¿Ndáaña ke̱ʼéra? Chi̱ndaʼára ta̱ Natán ña̱ ka̱ʼa̱nra xíʼin ta̱ David. Ta̱ Natán ni̱ka̱ʼa̱nra: “Ni̱xi̱yo iin ta̱ ku̱i̱ká ta ku̱a̱ʼání ndikachi sa̱na̱ra, soo ni̱xi̱yo iin ta̱ ndáʼvi ta iinlá kúú ndikachi sa̱na̱ra tí xi̱kuni̱níra. Ta̱ ku̱i̱ká ki̱ndaara ndikachi sana ta̱ ndáʼvi”. Ta̱ David ni̱sa̱a̱níra ta ka̱chira: “Ta̱ ku̱i̱ká xíniñúʼu kuvira”. Ta̱ Natán ni̱ka̱ʼa̱nra: “Yóʼó táki̱ʼva íyo ta̱ ku̱i̱ká kán saá íyoún”. Ni̱kusuchíní-inira ta ni̱ka̱ʼa̱nra: “Ni̱ki̱ʼvii̱ ku̱a̱chi nu̱ú Jehová”. Xa̱ʼa ndiʼi ña̱ ke̱ʼéra ku̱a̱ʼání tu̱ndóʼo ndo̱ʼora xíʼin na̱ veʼera. Jehová ta̱xira castigo ndaʼa̱ra, soo kǒo níxi̱ʼi̱ra xa̱ʼa ña̱ na̱túʼunra ña̱ ke̱ʼéra.

Ta̱ David xi̱kuni̱ra keʼéra iin templo nu̱ú ndasakáʼnuna Jehová. Soo Jehová nda̱ka̱xinra ta̱ Salomón se̱ʼe ta̱ David ña̱ keʼéraña. Ta̱ David ki̱xaʼá ndásaviíra ña̱ʼa ña̱ kuniñúʼuna ña̱ kuva̱ʼaña ta  ni̱ka̱ʼa̱nra: “Templo Jehová va̱ʼaní xíniñúʼu kuva̱ʼaña. Loʼova ta̱ Salomón, soo yi̱ʼi̱ chi̱ndeéra”. Ta̱ David ku̱a̱ʼání xu̱ʼún ta̱xira ña̱ kuva̱ʼaña. Ndu̱kúra na̱ xíni̱ va̱ʼa kachíñu, nda̱kayara oro xíʼin plata, ta nda̱kayara yitu̱n tú cedro tú íyo ñuu Tiro xíʼin Sidón. Tá si̱lóʼo kúma̱ní kuvira, ta̱xira plano ndaʼa̱ ta̱ Salomón ña̱ kunira ndáa ki̱ʼva kuva̱ʼa templo ta ni̱ka̱ʼa̱nra: “Jehová ni̱ka̱ʼa̱n xíʼi̱n ná kaʼyíi̱ ña̱yóʼo taxii̱ ndaʼún. Miíra chindeé yóʼó. Va̱ása yi̱ʼvíún. Ndakú koo iniún ta keʼún chiñu yóʼó.”