Omo Saulu ua tsile, Ndaviti ua suanene ha vuangana. Tele ali na miaka 30. Mu nima ya ku pua muangana imo miaka, Ndaviti ua kele helu lia nganda yeni ya vuangana ku vutsiki, kaha ua muene umo mpuevo ua cili. Kaha ua tantekeyele ngecize lizina lia mpuevo uaco Mbate-seva, kaha ua somboka kuli umo lisualale lizina lieni Uliya. Ndaviti ua tumine vantu va ka nehe Mbate-seva ku nganda. Kaha ua limuene neni ku muvila ngeci ua kele na lizimo. Ndaviti ua setekele ku sueka via lingile. Ua tumine ntuamena ua masualale veni a hake Uliya ku lutue lua ndzita na ku sondoloka ku nima yeni. Ngeci Uliya va mu tsihile, kaha Ndaviti ua ambata Mbate-seva.

Vunoni Yehova ua muene vupi vuose vua lingile Ndaviti. Vati ua mu lingile? Yehova ua tumine kapolofeto Natane kuli Ndaviti. Kaha Natane ua telele cisimo Ndaviti ngueni: ‘Kua kele umo mpite ua kele na vampanga va vengi, vunoni kua kele umo cihutu ua kele lika na umo muana mpanga ya lemene cikuma. Kaha uze mpite ua niekele muana mpanga ua cihutu.’ Ngeci Ndaviti ua tenukile na ku handeka ngueni: ‘Mpite uaco na pande ku tsa!’ Vunoni Natane ua mu lekele ngueni: ‘Yove vene mpite uaco!’ Ndaviti ua vuile ku vavala ca kama ku mutima, ngeci ua litavelele kuli Natane ngueni: ‘Nji na vulumuna ku meso a Yehova.’ Ovu vupi vua kokele lamba ya kama kuli Ndaviti na ku vusoko vueni. Yehova ua hele kasitiku kuli Ndaviti, vunoni ka mu tsihile muomu Ndaviti ua muesele vusunga na ku likehesa.

Mu nima ya ntsimbu, Ndaviti ua tondele ku tungila Yehova tembele, vunoni Yehova ua hanguile muaneni Solomone a tunge tembele yaco. Vutuhu ngoco, Ndaviti ua putukile ku viukisa viuma mu ku kuasa  Solomone na ku singanieka ngueni: ‘Tembele ya Yehova ya pande ku pua ya cili cikumakuma. Vunoni muanange Solomone a ci li ua mundende, noho nji mu kuase ku viukisa viuma.’ Ngeci Ndaviti ua lambuile vimbongo via vingi ku cipanga ca ku tunga. Ua tondele vaMesele va vutongue. Ua kunguluile olu na palata, na ku tumisa miti ya sendulu ku tundilila ku Tile na Sindone. Mua hetele ku hiehi na ku tsa ceni, Ndaviti ua hanene mikanda ya vati mua ku tungila tembele kuli Solomone. Kaha ua mu lekele ngueni: ‘Yehova ikeye ua nji tumine ku ku sonekela ovu vutumbe vua ku tunga. Yehova a ka ku kuasa. Kati u ivue vuoma. Pua ua ku kaniama kaha putuka ku tunga.’