Kema Saúl mijki, David pejki tlanauatia. Kipixtoya 30 xiuitl. Teipa, kema ya tlanauatijtoya miak xiuitl, kichijki se ueyi tlajtlakoli. Se youali kema itstoya kalpani, ipan ichaj kampa tlanauatiyaya, kiitak se yejyektsi siuatl. David kimatki motokaxtiyaya Betsabé uan iueue eliyaya Urías. Uajka, tlatitlanki ma kiualikakaj Betsabé uan motejki iuaya. Kema David kimatki Betsabé kipiaskia se konetsi, kinejki kitlatis tlen kichijtoya. Yeka kiiljuik katli kinyakanayaya itlateuijkauaj ma kitlayakanalti Urías kema tlateuiskiaj, uan ma kikauakaj iselti. Urías mijki ipan nopa tlateuijkayotl, uan teipa David mosiuajtik iuaya Betsabé.

Jehová kiitak nochi nopa amo kuali tlamantli tlen panotoya. ¿Tlake kichijki? Jehová kititlanki tlajtolpanextijketl Natán ma kikamanaljuiti David. Natán kiiljuik: “Itstoya se tlakatl katli tlatominpiayaya uan kinpixtoya miakej borregojmej. Uan itstoya seyok tlakatl katli tlauel teikneltsi uan san kipixtoya se pilborregojtsi katli tlauel kiikneliyaya. Uan nopa tlakatl katli tlatominpiayaya kiichtejki nopa iyojtsi pilborregojtsi tlen kipixtoya katli teikneltsi”. David tlauel kualanki uan kiijtok: “¡Nopa tlakatl katli tlatominpia kinamiki mikis!”. Uajka Natán kiiljuik: “¡Ta tieli kej nopa tlakatl!”. David tlauel mokuesok uan kiiljuik Natán: “Nelia nitlajtlakolchijtok iixpa Jehová”. Pampa David tlajtlakolchijki, ya uan ichampoyouaj kipixkej miak kuesoli uan tlaouijkayotl. Maske Jehová kitlatsakuiltik David, amo kimiktik pampa amo moueyimatki uan kiijtok tlen kichijtoya.

David kinekiyaya kichijchiuas nopa teokali kampa kiueyichiuaskiaj Jehová. Uan Jehová kiijtok Salomón, David ikone, kichijchiuaskia nopa teokali. Uajka David pejki kisentilia nochi tlen kitekiuiskia Salomón, uan  kiijtok: “Nopa kali kampa tijueyichiuasej Jehová moneki elis yejyektsi. Maske Salomón nojua telpokatl, na nijpaleuis”. David temakak miak tomij tlen ika kichijchiuaskiaj nopa teokali, uan kintemok katli kuali tekitiyayaj. Nojkia kisentilik oro, plata, uan kuauitl tlen kiualikakej tlen altepetl Tiro uan Sidón. Kema David nechka mikiskia, kimakak Salomón nopa planos kampa nesiyaya kenijkatsa kichijchiuaskia nopa teokali, uan kiiljuik: “Jehová nechiljuik ma nikijkuilo kenijkatsa kineki nopa teokali, uan nechiljuik ma nimitsmaka. Ya mitspaleuis. Amo ximajmaui, uan xijchijchiua nopa teokali”.