Keman Saúl momikilij, David mochiuak tekiuaj. Kipiaya 30 xiujmej. Panokej miak xiujmej, uan se youak, keman yetoya ikalkuako, kiitak se siuat tel kuakualtsin. David kimatik ke motokaytiaya Bat-Seba uan ke inamik katka se tateuijkej akin motokaytiaya Urías. David tanauatij maj kiualkuilianij ichan, iuan motekak, uan Bat-Seba mokokoxkatalij. David kitemoj kitatis tein kichiujka. Yejua ika kiluij akin kinixyekanaya itateuijkauan maj kitaliani Urías taixpan, uan maj satepan kikauanij iselti. Urías momikilij itech nejon neteuilis, uan satepan David monamiktij iuan Bat-Seba.

Sayoj ke Jiova kiitak nochi tein amo kuali tein panoka. ¿Toni kichiuaskia? Kititanik tanauatijkej Natán maj tajtoti iuan David. Natán kiluij: “Moajsia se takat tominpixkej akin kinpiaya miak ichkamej, uan se takat akin sayoj kipiaya se ichkatsin tein kiteltasojtaya. Takat tominpixkej kikuilij iichkatsin”. David tel kualanik uan kijtoj: “¡Nejon takat tominpixkej moneki mikis!”. Ijkuak, Natán kiluij: “¡Tejua nejon takat tominpixkej!”. David moteltayokoltij uan kiluij Natán: “Nitajtakoj iixpan Jiova”. Nejon tajtakol kiualkuilij David miak kuejmolmej, uan no ichankauan. Jiova kitatsakuiltij David, sayoj ke kikauak maj kisentokani nemini porin amo kitatijok tein kichiujka uan yolyemanik katka.

David kinekia kichijchiuilis Jiova se templo. Sayoj ke Jiova kiixpejpenak Salomón, ikonetsin David, maj kichijchiua. Yejua ika David peuak kisentilia nochi tein Salomón kitekitiltiskia uan kijtoj:  “Itemplo Jiova moneki yeski tel kualtsin. Salomón semi telpochok, sayoj ke niksentiliti nochi tein monekis uan ijkon nikpaleuis”. David kitetayokolij miak tomin tein kipiaya tein ika mochijchiuaskia templo. Kintemoj kuali tekitinij, kisentilij oro uan plata, uan kiualkuik cedro tein onkaya Tiro uan Sidón. Keman David yaya momikilitiya, kimakak Salomón amamej kampa nesia keniuj kichijchiuas templo uan kiluij: “Jiova nechnauatij maj nikijkuilo nejin uan maj nimitsmaka. Yejuatsin mitspaleuis. Amo ximoui. Ximoyolchikaua uan xikchiua tekit”.