Ijkuak Saúl omikik, David okipiaya 30 xiuitl uan omochi ueyi tekiua. Opanok miak xiuitl uan se yoak, ijkuak David okatka ikuapak ikalijtik, okitak se siuatl kuajkualtsin. David okimatki nin siuatl omotokayotiaya Bat-Seba uan inamik okatka se soldado tlen omotokayotiaya Urías. Ijkuakon, David otlanauati ma kiualikilikan Bat-Seba, iuan omotekak uan Bat-Seba kipiaskia ikone. David amo okinekiaya ma momati tlen okichi. Ik non, okilui akin okinyekanaya soldados ma kitlalikan Urías tlayekapan kanin omoteuitoj uan iselti ma kikauakan. Urías omikik itech non guerra uan satepan David omonamikti iuan Bat-Seba.

Pero Jehová okitak nochi tlen opanok. ¿Tlen okichi Jehová? Okititlanki teotlajtojki Natán ma motlapouiti iuan David. Natán okilui David: “Okatka se tlakatl tlen okipiaya miak tomin uan miakej ichkamej uan okatka okse tlakatl tlen amo okipiaya tomin uan okipiaya san se ichkatsin tlen sapanoa okitlasojtlaya. Tlakatl tlen okipiaya miak tomin okikixtili ichkatsin tlakatl tlen amo itlaj okipiaya”. David okualanki uan okijto: “¡Non tlakatl moneki ma miki!”. Ijkuakon, Natán okilui: “¡Te otikchi ken non tlakatl tlen okipiaya tomin!”. David sapanoa omoyolkoko uan okilui Natán: “Onitlajtlakolchi ixpan Jehová”. David uan ikalchanejkauan sapanoa otlajyouijkej porque ye otlajtlakolchi. Jehová okitlajyouilti David, pero okikauili ma yolto porque okatka yolyamanki uan okiseli itlajtlakol.

David okinekiaya kichijchiuilis Jehová se teokali. Pero Jehová  okipejpenki ikone David tlen omotokayotiaya Salomón para ma kichijchiua teokali. Ik non, David opejki kiyektlalia tlen kitekitiltiskia Salomón uan okijto: “Iteokal Jehová moneki yetos sapanoa kuajkualtsin. Salomón ok telpochtli, pero nikpaleuis uan nikyektlalis nochi tlen kitekitiltis”. David okitemakak miak tomin para kichijchiuaskiaj teokali. Okintemo akinmej kuali otekitiayaj, okinechiko oro, plata uan miak kuauitl tlen okiualikakej itech altepemej Tiro uan Sidón. Ijkuak David yimikiskia, okimakak Salomón se amatl tlen okijtoaya ken kichijchiuaskiaj teokali uan okilui: “Jehová onechnauati ma nikijkuilo nin amatl uan ma nimitsmaka. Ye mitspaleuis. Amo ximomojti. Ximoyolchikaua uan xikchiua nin tekitl”.