Saul sho a si, David okwa ningi omukwaniilwa. Okwa li e na omimvo 30 sho a ningi omukwaniilwa. Okwa kala omukwaniilwa omimvo odhindji, ihe ongulohi yimwe manga a li kontala yongulu yuuwa we, okwa mono omukiintu omwaanawa ti iyogo. David okwa mono kutya oye Batseba, ngoka a hokanwa komukwiita Uria. David okwa tumu aatumwa ya ka tale Batseba. Okwa lala naye, e ta ningi etegelelo. David okwa li ta kambadhala okuholeka shoka a ninga. Okwa lombwele ondjayi yiita ye yi tule Uria komeho molugodhi, opo a dhipagwe. Sho Uria a dhipagwa, David okwa hokana po Batseba.

Jehova okwa li e wete iinima iiwinayi ayihe mbyoka ya longwa kuDavid. Okwa li a ningi po shike? Jehova okwa tumu omuhunganeki Natan kuDavid. Natan okwa ti: ‘Momukunda gumwe omwa li omulumentu omuyamba e na oonzi odhindji, nomukwawo ohepele e na okanzi kamwe hoka e hole unene. Omuyamba okwa kutha po okanzi kohepele.’ David okwa geye noonkondo e ta ti: ‘Omuyamba ngoka okwi ilongela eso.’ Natan okwa lombwele ihe David a ti: ‘Omulumentu ngoka ongoye.’ Omutima gwaDavid ogwa li gwa tekauka noonkondo, e ta lombwele Natan ta ti: ‘Ngame onda yono kuJehova.’ Eyono ndika olye etele David naanegumbo lye uupyakadhi owundji. Jehova okwa geele David, ihe okwe mu etha a kale nomwenyo, molwaashono okwa li omunashili nomwiifupipiki.

David okwa li a hala okutungila Jehova otempeli, ihe Jehova okwa hogolola Salomo, omwanamati gwaDavid, oye e yi tunge. David okwa longekidha iinima ayihe mbyoka Salomo a li e na okulongitha, e ta ti:  ‘Otempeli yaJehova oyi na okukala yi iwetikile. Salomo omunona natango, ihe otandi ke mu kwathela okulongekidha iinima.’ David okwa gandja iimaliwa oyindji yi ka kwathele miilonga yokutunga. Okwa kongo aantu mboka ye na uunkulungu wokutunga. Okwa gongele oshingoli noshisiliveli nokwe etelwa omiti dhomisedeli okuza kuTiro nokuSidon. Sho David e li pokusa, okwa pe Salomo ondunge yokutunga otempeli. David okwe mu lombwele a ti: ‘Jehova oye a lombwele ndje ndi ku nyolele iinima mbika. Ote ke ku kwathela. Ino tila, kala wu na omukumo e to tameke iilonga.’