Vaavaa Sawuli aakhwileiye, Tavite aakhala mwene arino iyaakha 30. Ivinre iyaakha sincipale ari mwene, nihiku nimoha ohiyu, Tavite aamoona muthiyana ooreera nsina nawe Patesepa. Tavite aasuwela wi iyawe aari nakhoco awiichaniwa Uriya. Tavite aamwiichaniha Patesepa. Awo yaakona vamoha nave Patesepa aarupala. Tavite aaheererya okhuwa nave aamuleela mutokweene a anakhoco wi Uriya ahoolele ekhoco nave emuhiye mukhateiye. Vaavaa Uriya aakhwileiye okhoconi, Tavite aamukuxa Patesepa akhala mwaariye.

Nyenya Yehova aanoona ichu soothene. Vano tiheeni enreiye? Aamuruma mulipa a miririmu Natani wi aye wa Tavite. Natani aahi wa mwene Tavite: ‘Mulopwana mmoha ooreela aakhalano ipucepuche sawaaca, nave mulopwana oohaawa aarino epucepuche emoha ekhaani nave yaari ntoko mwanawe. Mulipa ooreela aakusa epucepuche ya ole oohaawa amwiiphela muleco awe.’ Tavite aanyeenyeya aloca: ‘Yoowo eenreno echu yeeyo onaphwanela okhwa.’ Natani aahi wa Tavite: ‘Mulopwana yoowo ti weyaano.’ Tavite aatepa othanana nave aaloca wa Natani: ‘Kohaachekela Apwiya!’ Yoocheka yeela yaatannya makacamiho mancipale mu emusi awe. Yehova aamulaka Tavite, nave aamuhiya wi akhale ntakhara wi aari eekhaikhai ni awiiyeviha.

Tavite aanachuna omutekela Yehova empa, nto Muluku aamuthanlile mwaana a Tavite Solomoni wi akhale tanii ateke. Tavite aapacerya othukumanya ichu sa otekano nave aahuupuwela mmurimani mwawe wi: ‘Empa ya Yehova enaphwanela okhala yoocicimiheya. Nto  Solomoni nlelo mwaana, kinahaala omukhaviherya othukumanya ichu sa otekano.’ Tavite aaveleela ikhorowa sawe wi iphariheliwe mmuteko wa oteka. Aawaavya alipa oteka phaama, aathukumanya ewooro ni eparata nave ithaapwa saaruuhiwa o Tire ni Sitoni. Omakuchuwelo wa okumi awe, Tavite aamunnya Solomoni yoochariha ya oteka empa eyo. Owo aahi: ‘Inaphwanyeya soorempwa sene ntoko Apwiya akisuwelinhaaya. Owo onamookhaviherya. Ohituthume, opacerye muteko ohoovaka echu.’