Saul daaztsą́ bikéédóó David 30 binááhaigo naatʼáanii silı̨́ı̨́ʼ. Łah hakin bighą́ąʼgi nijigháago asdzání ayóó ánóolnin léiʼ jiiłtsą́. David éí asdzání Bath-shííba wolyéego hoł bééhoozin, áádóó siláo Yuráíyah wolyéhígíí beʼasdzą́ą́ jílı̨́ı̨́ lá. David éí Bath-shííba yíká iʼííłʼaʼ. Haa níyáago bił jineezhtéezhgo há aʼniiltsąąd. David ájíítʼįįdígíí chʼééh nazhniłʼin. Siláo binantʼaʼí ábijiní, Yéigo daʼahijigą́ąjįʼ Yuráíyah bił dookah áko biʼdiyoolyééł. Yuráíyah biʼdiisyı̨́ bikéédóó David éí Bath-shííba jizyeh.

Doo yáʼátʼééhgóó áhóótʼįįdígíí Jiihóvah yiyiiłtsą́. Áko Jiihóvah éí halneʼii Néíthan, David yichʼįʼ ayííłʼaʼ. Néíthan ání: ‘Łaʼ diné ayóó atʼı̨́įgo bidibé tʼóó ahayóí, ndi diné bahojoobáʼígíí bibéhé tʼááłaʼígo ayóóʼáyóʼní. Diné atʼíinii éí diné bahojoobáʼígíí bibéhé yighainíłtı̨́.ʼ David báhóóchįįdgo ání: ‘Kójiidzaaígíí dazhdootsaał.ʼ Néíthan áhałní: ‘Ni éí díí diné atʼíinii nílı̨́.ʼ David yínííł silı̨́įʼgo ání: ‘Jiihóvah bichʼįʼ ádił asésiih.ʼ Bąąhági ajíítʼįįdígíí éí hó dóó haghan hazʼą́ągi bee bíhoozhdiiłtʼiʼ. Áko Jiihóvah éí David yá nihoníʼą́, ndi aʼohgo ájítʼéego índa doo honaʼadloʼgóó Jiihóvah tʼáadoo hwiisxı̨́į da.

David éí Jiihóvah kin biiʼ sohodizin bá ádeeshłííł jiniizı̨́ı̨́ʼ, ndi Jiihóvah éí hayeʼ Sálaman kin íidoolíiłgo yeidiníʼą́. David ání:  ‘Jiihóvah bikin ayóó ánoolnin doo. Sálaman tʼah ániid naaghá, áko bee nizhdoolnishígíí há hashtʼeʼniheeshníiłgo bee bíká adeeshwoł.ʼ Áádóó tʼáá bí bibéeso yee eelwod índa naanish dayiichįįhii há yikʼíneeztą́ą́ʼ. Óola dóó béésh łigaii áłah áyiilaa, áádóó dilkʼis tsin neheeshjííʼ Táir dóó Sáídandę́ę́ʼ nidahaashjaaʼ. Áko dazdootsaałjįʼ ahoolzhiizhgo, hayeʼ Sálaman kin bikʼehgo ádoolníłígíí baazhníłtsoozgo ábijiní: ‘Díí Jiihóvah íinízinii bikʼehgo áshłaa. Éí níká análwoʼ doo, áko tʼáadoo nił yéʼí, nidziil ádílnéehgo diilnish.ʼ