Etyi Saulu ankhia, David akala ohamba. David ankho una omanima 30. Namphila ankho ohamba momanima omanyingi, motyinthiki tyimwe etyi ekahi keulu liondyuo yae, amono omukai umwe omuwa unene. Enyina liomukai oo litiwa o Bate-seba iya ankho wanepua nefualali litiwa Uliya. David aihanena Bate-seba mondyuo yae, alala nae. Bate-seba akala omulemi. David ahande okuholeka etyi alinga. Apopila omutumini womafualali atuale Uliya komutwe womafualali ekahi nokulwa iya omafualali aemuhipo. Uliya aipawa, David anepe Bate-seba.

Mahi Jeova wamona ovipuka aviho viaenda-po. Oityi alinga? Jeova atumu omuuli Natan ku David. Natan emupopila okuti: ‘Omulume umwe omuhona, ankho una onongi ononyingi iya omukuavo wahepa, una vala ongi ike onthutu ehole unene. Omulume wokuamona apolopo ongi oyo yomulume wahepa.’ David anumana unene apopi okuti: ‘Omulume oo wokuamona ñgeno wipaua!’ Natan apopila David okuti: ‘Omulume omuhona ove!’ David atyimuihama, aimbuka okuti walinga onkhali, apopi okuti: ‘Nalinga onkhali ku Jeova.’ Onkhali oyo aiyetela David nombunga yae ovitateka ovinene. Jeova akoyesa David, mahi ehemuipaa mokonda omukuatyili nokueliola omutima.

David ankho uhanda okutunga ondyuo ya Jeova, mahi otyilinga otyo, Jeova etyiavela Salomau omona wa David. David ehimbika okuongiya ovipuka viokutunga pala Salomau iya apopi okuti:  ‘Ondyuo ya Jeova maikala ongwa unene. Salomau nkhele omona, mahi mandyimukuatesako okuongiya ovipuka.’ David aave onombongo ononyingi opo akuateseko ovilinga viokutunga. David aovola ovaundapi ovanongo. Aongiya opalata no olu nomavai viatunda ko Tiro no ko Sídon. Etyi David ehungi kokunkhia avela Salomau omukanda upopia oñgeni ondyuo ya Huku maitungwa. Apopi okuti: ‘Jeova oe wahoneka ovipuka aviho evi nekuavela.Jeova mekukuatesako. Uhatile owoma. Kala tyapama ovilinga viende nawa.’