Mɔɔ Sɔɔlo wule la, Devidi ralile belemgbunli. Ɛnee yeli ɛvolɛ 30. Mɔɔ ɔralile belemgbunli la anzi mekɛ ekyi anu, ɔnwunle raalɛ kɛnlɛma bie kenle ko nɔsolɛ nu wɔ mekɛ mɔɔ ɔgyi ye sua ne ati zo la. Devidi nwunle kɛ bɛfɛlɛ raalɛ ne Batehyɛba na ɔ hu a le sogyanli Yulaya. Devidi vɛlɛle Batehyɛba wɔ ye sua nu. Ɔ nee ye lale na ɔnrenzɛle. Devidi bɔle mɔdenle kɛ ɔkeda ye ɛtane ne azo. Ɔvale nrɛlaleɛ ɔhɔmaanle ye sogya kpanyinli ne kɛ ɔva Yulaya ɔzie konle ne ɛleka mɔɔ yɛ se la. Mɔɔ bɛhunle Yulaya la, Devidi gyale Batehyɛba.

Noko Gyihova nwunle mɔɔ hɔle zo la amuala. Duzu a ɔyɛle a? Gyihova zoanle ngapezonli Neetan wɔ Devidi ɛkɛ. Neetan hanle hilele Devidi kɛ: ‘Ɛnee sukoavolɛ bie lɛ mboane dɔɔnwo, yɛɛ ehyianli bie lɛ ye boane ralɛ kokye mɔɔ ɔkulo ye kpole kpalɛ a. Kenle ko sukoavolɛ ne hɔhyele nrenyia ehyianli ne boane ne.’ Devidi vale ɛya kpole na ɔhanle kɛ: ‘Ɔwɔ kɛ bɛku sukoavolɛ ɛhye!’ Akee Neetan zele Devidi kɛ: ‘Sonla zɔhane, yemɔ a le ɛdawɔ!’ Devidi lile nyane na ɔhanle kɛ: ‘Meyɛ ɛtane metia Gyihova.’ Ɛtane ɛhye mɔɔ Devidi yɛle la vale ngyegyelɛ dɔɔnwo rale ye sua nu. Gyihova hwenle Devidi anzo, noko yeangu ye ɔluakɛ ɔdi nɔhalɛ yɛɛ ɔbɛlɛ ɔ nwo aze.

Ɛnee Devidi kpondɛ kɛ ɔsi ɛzonlenlɛ sua ɔmaa Gyihova, noko Gyihova maanle ɔ ra Sɔlɔmɔn a zile a. Devidi kpondɛle ninyɛne mɔɔ Sɔlɔmɔn bahyia nwo la ziele ɛkɛ. Ɔhanle kɛ: ‘Ɔwɔ  kɛ Gyihova ɛzonlenlɛ sua ne yɛ kɛnlɛma. Me ra ye le kakula, yemɔti mebaboɔboa ninyɛne nloa meazie ye ɛkɛ.’ Devidi vale ezukoa dɔɔnwo boale sua ne ɛzilɛ. Ɔkpondɛle menli mɔɔ ze suazilɛ nye zo la. Eza ɔboɔboale nvutuke, dwɛtɛ fufule nee sida mbaka nloa ɔvile Taya nee Saedɛn. Mɔɔ ɔka ekyii Devidi wu la, ɔhilele Sɔlɔmɔn kɛzi ɔwɔ kɛ ɔsi ɛzonlenlɛ sua ne la. Ɔhanle kɛ: ‘Gyihova a maanle mengɛlɛle ninyɛne ɛhye mendole ɛkɛ a. Ɔbaboa wɔ. Mmasulo fee, si ɛ kɛnra na yɛ gyima ne.’