Nen inatey si Saul, si David la so nan-ari ed Israel. Say taon to et 30. Kayari na pigaran taon, diad sakey ya labi legan ya walad tagey na palasyo si David, walay atandagan ton magangganan bii. Naamtaan nen David ya say ngaran to may bii et Bat-sheba tan walay asawa to ya say ngaran to et Urias, sakey ya sundalo. Impatawag nen David si Bat-sheba ed palasyo to. Nan-akdol iran dua, tan nanlukon si Bat-sheba. Insekreto nen David so ginawa to. Ingganggan toy heneral na saray sundalo ya ipuesto tod arap si Urias legan na guerra, insan ira onatras pian napatey na kalaban. Nen inatey si Urias, inala nen David si Bat-sheba pian magmaliw ya asawa to.

Balet anengneng nen Jehova so amin ya mauges ya ginawa nen David. Anto kasi gawaen nen Jehova? Imbaki toy propetan Natan ed si David. Imbaga nen Natan ed si David: ‘Walay mayaman ya laki ya dakdakel so karnero to, tan walay pobrin laki ya walaan labat na sakey ya melag a karnero ya inar-aro to. Balet inala na mayaman a laki imay saksakey ya karnero na samay pobri.’ Nampasnok si David tan imbaga to: ‘Nepeg ya ompatey itan ya laki!’ Insan imbaga nen Natan ed si David: ‘Sika may lakin mayaman!’ Nan-ermen si David, tan inamin tod si Natan: ‘Nankasalanan ak ed si Jehova.’ Lapud kasalanan nen David, dakdakel so sinmabin problema to tan ed pamilya to. Dinusa nen Jehova si David balet agto pinatey lapud inamin nen David so kasalanan to tan nampaabeba.

Labay nen David so manpaalagey na templo parad si Jehova, balet say pinili nen Jehova ya manpaalagey et si Solomon ya anak  nen David. Imparaan nen David iray usaren nen Solomon. Imbaga nen David: ‘Dapat balibali so templo nen Jehova. Pero ugaw ni Solomon, kanian tulongan kon iparaan iray usaren to.’ Dakdakel ya kuarta so indonasyon nen David pian usaren ed pampaalagey. Nananap na saray marundunong ya mankimey. Nantipon na balitok tan pilak, tan nampaala na saray kiew na sedro ya manlapud Tiro tan Sidon. Nen asingger lan ompatey si David, inter tod si Solomon so plano na templo. Imbaga tod si Solomon: ‘Impaisulat ed siak nen Jehova iraya pian tumboken mo. Tulongan ka nen Jehova. Agka natatakot. Manpabiskeg ka tan igapom lay kimey.’