Aus Saul storf, wort David de Kjennich. Dee wia dan 30 Joa. Aus David aul een poa Joa Kjennich wia, sach hee eenen Owent von sien Kjennichshus oppem Dak eene sea schmocke Fru. David wort en, daut dee Batseba heet un daut dee met eenen Soldot befriet wia, waut Uria heet. David leet Batseba no sien Kjennichshus komen. Dee hauden Jeschlajchtsvekjia un Batseba wort schwanga. David wull daut plietsch hoolen. Hee säd to dän Väaschten von siene Soldoten, dee sull Uria gaunz väaren em Kjrich hanstalen un dan sullen de äwaje Soldoten sikj trigjtrakjen. Uria wort doa dootjemoakt un David befried sikj met Batseba.

Jehova sach aul daut schlajchte, waut doa passieed. Waut wudd Jehova nu doonen? Hee schekjt dän Profeet Natan no David. Dee säd to David: “Doa wia een rikja Maun, waut väl Schop haud, un een oama Maun, waut bloos een kjlienet Schopkje haud, waut hee sea väl räakjend. Nu neem de rikja Maun dän Oamen sien eensjet Schopkje wajch.” David wort doll un säd: “Dis rikja Maun sull dootjemoakt!” Natan säd to David: “Du best dee rikja Maun!” David wia sea truarich. Hee stunt daut too un säd: “Ekj hab jäajen Jehova jesindicht.” Wäajen dise Sind kjeem väl Trubbel äwa David un siene Famielje. Jehova bestroft David, oba hee leet am läwen, wiels dee opprechtich un deemootich wia.

David wull fa Jehova eenen Tempel buen, oba Jehova wull, daut dän sien Sän Salomo daut deed. David funk aun, eenjet fa Salomo  reedtomoaken, un säd: “Jehova sien Tempel saul besonda sennen. Wäajen Salomo noch junk es, woa ekj dän halpen, aules reedtomoaken.” David jeef väl von sien ieejnet Jelt un hee socht goode Oabeida. Hee brocht Golt un Selwa toop un leet von Tierus un Sidon Zeedaholt brinjen. Aus sien Läwen meist to Enj wia, jeef David Salomo de Plons fa dän Tempel. Hee säd: “Jehova wull haben, ekj sull daut fa die oppschriewen. Jehova woat die halpen. Hab nich Angst. Sie stoakj un go aun de Oabeit naun!”