Saúl huañujpica Davidmi catij mandaj tucurca. Paica 30 huatacunatami charirca. Achca huatacuna qꞌuipaca shuj jatun juchapimi urmarca. Shuj tutaca huasi jahuapi puricushpami shuj sumaj huarmita ricurca. Davidca chai huarmi pi cashcatami tapunaman cacharca. Paica Betsabé (Bat-Seba) shutimi carca. Urías shuti soldadopaj huarmimi carca. Davidca pushamuchun cachashpami paihuan chayarinacurca. Qꞌuipaca Betsabeca chichumi saquirirca. Davidca pai rurashcata pacasha nishpami soldadocunata mandajtaca, ‘Uriastaca soldadocuna macanacucuj puntapi churashpa paillata saquinguichij’ nirca. Uriasca chai macanacuipimi huañurca. Qꞌuipaca Davidca Betsabehuanmi cazararca.

Diosca David mana allicunata rurashcatami tucuita ricurca. ¿Diosca imatataj rurarca? Profeta Natantami Davidhuan parlachun cacharca. Paica, ‘charij runaca achca ovejacunayujmi carca. Cutin huajcha runaca shuj ovejallatami charirca. Chaitaca achcatami cꞌuyarca. Charij runaca chai shujlla ovejatami quichurca’ nircami. Davidca achcata pꞌiñarishpami, ‘¡chai runaca huañunatajmi can!’ nirca. Natanca, ‘¡chai runaca canllatajmari cangui!’ nircami. Shina nijpimi Davidca achcata llaquirishpa Natantaca, ‘Jehovapaj ñaupajpimari juchata rurashcani’ nirca. Chai juchapi urmashcamantami Davidpish paipaj familiapish achca llaquicunata charirca. Pero Davidca mana jatun tucurcachu. Chaimantami Diosca castigashpapish causashpa catichun saquirca.

Davidca Jehová Diospajmi shuj huasita rurasha nirca. Pero Diosca paipaj churi Salomontami chai huasita rurachun agllarca. Davidca Salomón imalla minishtishcata allichishpaca, ‘Jehová Diospaj  huasica sumajmi cana can. Salomonca chairaj huambrarajmari. Chaimantami paita ayudasha’ nirca. Davidca chai huasita rurachunmi achca cullquita convidarca. Shinallataj alli trabajadorcunata mashcarca, platata, orotapishmi tandachirca. Tiromanta Sidonmanta caspicunatapishmi apamurca. Davidca manaraj huañushpami Salomonmanca Diospaj huasita shayachichun planocunata curca. Qꞌuipaca Davidca, ‘Jehovami paipaj huasita ima shina ruranata canman cuchun ñucaman quillcachirca. Paimi cantaca ayudanga. Ama manchaichu. Rurai callarilla’ nircami.