Saul wañukuptinmi Davidña 30 watanpi kachkaspan kamachiyta qallaykurqa. Huk tutam Davidqa yachasqanpa hawanpi purikuchkaspan kuyayllapaq Betsabey sutiyuq warmita rikururqa. Davidqa yacharqam Betsabeyqa Uriaspa warmin kasqanta. Chaywanpas qayarachispanmi paywan puñukururqa, chaynapim Betsabeyqa wiksayakururqa. Huchallikusqanta mana yachanankupaqmi, Davidqa kamachirqa tropakunapa puntanman Uriasta churaruspanku sapallanta saqirunankupaq, chaynapim Uriasqa wañururqa. Chaymantam Davidqa Betsabeywan casarakururqa.

Jehova Diosmi ichaqa Davidpa huchallikusqanta rikurqa, hinaspanmi Natanta kacharqa Davidman kaynata willananpaq: “Huk apu runapam karqa achkallaña ovejankuna, wakcha runapañataqmi chullachalla, chay ovejachantam anchata kuyarqa. Ichaqa apu runam qichuruspan nakakururqa”, nispa. Davidñataqmi piñasqallaña nirqa: “¡Chay apu runaqa wañunanmi!”, nispa. Natanñataqmi nirqa: “¡Chay apu runa hinam qampas kanki!”, nispa. Davidqa llumpay llakisqam Natanta nirqa: “Diospa qayllanpim huchallikuruni”, nispa. Huchallikusqanraykum Davidqa aylluntin sasachakuykunapi tarikurqa. Diosqa Davidtam castigarurqa, ichaqa sunqumanta wanakuptinmi mana wañurachirqachu.

Davidqa Diospa wasintam ruwayta munarqa, ichaqa Diosmi akllarurqaña Salomon ruwananpaq, Salomonqa Davidpa churinmi karqa. Chaymi Davidqa Salomon ruwananpaq tukuy imata allichayta  qallaykurqa, hinaspam nirqa: “Diospa wasinqa suma-sumaqmi kanan. Churiyqa warmallaraqmi, chaymi yanapasaq”, nispa. Chaymi Davidqa achka-achka qullqita qurqa. Maskarqataqmi allin llamkaqkunatapas hinaspapas cedro sachatam Tiromantawan Sidon nacionmanta apachimurqa. Wañukunanpaqña kachkaspanmi churin Salomonta nirqa: “Jehova Diosmi niwarqa imaynata ruwanaykipaq qamta yachachinaypaq. Paymi yanapasunki, ama manchakuychu”, nispa.