Saulpa wañupusqan qhepamanmi Davidqa 30 watanpi Israelpi rey karan. Unayta kamachikushaqtinmi, juj tuta palacionpa techonpi kashaqtin sumaq rijch’ayniyoq warmita rikurusqa. Davidqa yacharusqan sutin Bat-seba (Betsabé) kasqanta, payqa Uriaspa esposanmi karan. Jinaspa Bat-sebata wajachimuspa paywan puñuran, jinan warmiqa onqoq rijuriran. Davidqa juchallikusqanta pakananpaqmi ejercitonpi umalliqta kamachiran, Uriasta guerrapi ñaupaqman churaspa paymanta ayqerikunankupaq. Jinan Uriasqa guerrapi wañupuran, chay qhepamantaq Davidqa Bat-sebawan casarakuran.

Diosqa rikumusharanmi chaykuna pasasqanta, chhaynaqa, ¿imatan ruwaran? Profeta Natantan kacharan Davidwan rimamunanpaq. Natanmi niran: “Juj qhapaq runan askha ovejakunayoq karan, juj wajchataq ancha munakusqan juj ovejallayoq karan. Jinan chay qhapaqqa wajchaq ovejanta qechurapuran”, nispa. Davidtaq sinchita phiñakuspa niran: “¡Chay qhapaq runaqa wañunanmi!”, nispa. Natantaq niran: “¡Qanmi chay qhapaq runa jina kanki!”, nispa. Davidqa sinchita llakikuspan Natanta niran: “Dios contran juchallikuni”, nispa. Chay juchanmantan Davidpas familianpas problemakunapi rikukuranku. Jehová Diosqa castigaranmi Davidta, ichaqa manan wañuchiranchu juchanmanta pesapakusqanrayku.

Davidqa Jehová Diospaqmi templota ruwayta munaran, Diosmi ichaqa wawan Salomonta ajllaran ruwananpaq. Jinan Davidqa  imaymana cosaskunata alistaran, piensarantaq: “Jehová Diospa templonqa ancha sumaqmi kanan, wawayqa waynallaraqmi, chaymi imaymanata alistapusaq”, nispa. Davidqa qolqentan qoran, allin llank’aqkunatan maskharan, qoritapas qolqetapas juñuranmi. Tiro, Sidón llaqtakunamantataq maderata apachimuran. Wañupunanpaqña kashaqtinmi Salomonman planota qoran templota ruwananpaq, nirantaq: “Diosmi kay planota qowan, paymi yanapasunki, mana manchakuspan ruwanayki”, nispa.