Кеда муло о Саул, о Давид уло цари. Тегани сине ле 30 берш. Накхле некобор берша откеда уло цари, јекх диве иклило ко крови тари пли палата хем адатхар дикхља јекхе шуже ромња. О Давид дознајнѓа кај лакоро анав тано Витсавеа хем кај тани женими јекхе војникоја со викинела пе Урија. О Давид вакерѓа те анен ла ки палата. Тегани ов суќа лаја хем ој ачхили кхамни. О Давид мангља те гаравел адава со керѓа. Ов вакерѓа е заповедникоске е војскакоро те чхивел е Урија ко прва редија кеда ка џан те боринен пе, хем пало адава сарине те циден пе палал, те мукхен ле коркори. Тегани е Урија мударѓе ле ки војна, а о Давид леља е Витсавеа ромњаке.

Ама, о Јехова дикхља са о лошна буќа со керѓа лен. Со керѓа о Јехова? Ов бичхалѓа пле пророко е Натане ко Давид. О Натан вакерѓа леске: „Јекх барвало мануш сине ле бут бакхре, а јекх чороло мануш сине ле само јекх бакхро со мангела ле сине бут. Ама, о барвало мануш леља о бакхро е чоролескоро“. О Давид хољанѓа хем вакерѓа: „Адава барвало мануш ваљани те мерел!“ Тегани о Натан вакерѓа е Давидеске: „Ту сиан адава барвало мануш!“ Адава бут погодинѓа е Давиде хем признајнѓа е Натанеске: „Грешинѓум е Јеховаске“. Башо акава грево со керѓа ле, о Давид хем лескири фамилија сине лен бут неволје. О Јехова казнинѓа е Давиде ама мукхља ле џивдо адалеске со сине искрено хем понизно.

Покасно, о Давид мангља те градинел храми е Јеховаске, ама о Јехова биринѓа лескере чхаве е Соломоне те градинел леске храми. О Давид почминѓа те спреминел материјали е Соломонеске  те шај те градинел о храми. О Давид вакерѓа: „О храми е Јеховаскоро мора те овел бут шужо. О Соломон тано панда терно, ама ме ка поможинав ле. Ка спреминав са со ваљани леске“. О Давид денѓа бут паре, аракхља шукар мајсторија хем кхединѓа бут злато хем сребро. Исто аѓаар, ов анѓа кедрово каш таро Тир хем таро Сидон. Англедер те мерел, о Давид денѓа е Соломонеске о планија башо градибе е храмескоро. Ов вакерѓа: „О Јехова вакерѓа манге те пишинав акала буќа те шај те дав лен туке. О Јехова ка поможинел тут. Ма дара ов храбро хем почмин те градине“.