Mudafa mambo Sauli, Dhavidhi adzakhala mambo. Iye akhali na pyaka 30. Mukupita pyaka pingasi ninga mambo, ntsiku inango, pikhali iye padzulu pa nyumba yace, iye aona nkazi wakubalika. Dhavidhi adzindikira kuti nkazi unoyu akhacemerwa Bhatesebha, pontho kuti akhali nkazi wa mamuna akhacemerwa Uriya. Dhavidhi acemeresa Bhatesebha ku nyumba kwace. Iwo apita m’mabonde, Bhatesebha mbakhala na pathupi. Dhavidhi ayesera kubisa madodo ace. Iye apanga nkadamu wa anyankhondo toera Uriya apite patsogolo pakumenya nkhondo. Mudaphiwa Uriya ku nkhondo, Dhavidhi amanga banja na Bhatesebha.

Mbwenye Yahova akhaona pinthu pyonsene pikhacitika. Kodi iye mbadacitanji? Yahova atuma mprofeta Natani toera kulonga na Dhavidhi. Natani alonga: ‘Mamuna wakupfuma akhali na mabira mazinji, mbwenye mamuna wakutcerenga akhali na bira ibodzi ing’ono yakuti akhaifuna kakamwe. Mamuna wakupfuma akwata bira ibodzi ikhali na mamuna wakutcerenga.’ Dhavidhi aipirwa kakamwe, mbalonga: ‘Mamuna wakupfuma athema kufa!’ Buluka penepo, Natani apanga Dhavidhi: ‘Mamuna wakupfuma ndimwe!’ Dhavidhi atsukwala kakamwe, pontho apanga Natani madawo ace: ‘Ndadawa pamaso pa Yahova.’ Madawo anewa abweresa nyatwa kuna Dhavidhi na banjace. Yahova atcunyusa Dhavidhi, mbwenye antawirisa kukhala maso thangwi Dhavidhi akhali wakukhulupirika na wakucepeseka.

Dhavidhi akhafuna kumangira Yahova templo, mbwenye Yahova asankhula mwana wa Dhavidhi akhacemerwa Salomoni toera kumanga  templo. Dhavidhi atoma kucitira Salomoni masasanyiro, mbalonga: ‘Templo ya Yahova isafunika kukhala ya mbiri kakamwe. Salomoni aciri mwana, mbwenye ndinamphedza kucita masasanyiro.’ Dhavidhi apereka kobiri izinji toera iphatisirwe pakumanga templo. Iye asaka anyabasa aluso. Iye agumanyiza ouro, parata na usalu wa sedha wakubuluka ku Tiro na ku Sidhoni. Pikhali iye cifupi na kufa, Dhavidhi apanga Salomoni kuti templo ikhafunika kumangwa tani. Iye alonga: ‘Yahova andipanga toera kukulembera ipi. Yahova anakuphedza. Leka gopa. Khala wacipapo mbuphata basa.’