Na ngoi so Saül akui awe, David aga gbia. Lo yeke lani na ngu 30. Na peko ti so lo ga gbia asara ambeni ngu tongaso, na mbeni bï na ngoi so David ayeke na nduzu na li ti da ti lo ti gbia, lo bâ mbeni pendere wali. David aga ti hinga so iri ti wali ni ayeke Bath-Shéba nga lo sara mariage na mbeni turugu ti lo so iri ti lo ayeke Urie. David ahunda si a ga na Bath-Shéba na da ti lo ti gbia. Lo na lo abungbi koli na wali, na Bath-Shéba amû ngo. David agi ti honde ye so lo sara so. Lo mû yanga na zo so ayeke na li ti aturugu ti lo ti zia Urie na lê ti bira ni na atanga ti azo ni akiri na peko. Na peko ti so a fâ Urie, David asara mariage na Bath-Shéba.

Me Jéhovah abâ aye ti sioni kue so asi so. Nyen la lo sara? Jéhovah atokua prophète Nathan ti bâ David. Nathan atene na lo: ‘Mbeni zo ti mosoro ayeke na gbâ ti ataba nga mbeni wayere ayeke gï na mbeni kete taba so lo ye lo mingi. Zo ti mosoro so amû gï taba ti wayere so.’ David asara ngonzo na lo tene: ‘Zo ti mosoro so alingbi na kuâ!’ Nathan atene na David: ‘Mo la mo yeke zo ti mosoro so!’ Vundu ahon ndö ti David, na lo fa faute ti lo na Nathan, lo tene: ‘Mbi sara siokpari na terê ti Jéhovah.’ Siokpari so David asara so aga na kpale mingi na fami ti lo. Jéhovah apunir David me lo zia si lo ngbâ na fini ndali ti so lo tene tâ tënë nga lo sara terê ti lo kete.

David aye lani ti leke mbeni temple na Jéhovah, me Jéhovah asoro molenge ti lo Salomon ti leke temple ni. David akomanse ti bungbi aye ti lekengo na temple ni ti zia nduru ndali ti Salomon, na  lo tene na lo: ‘Temple ti Jéhovah adoit ti duti pendere. Salomon ayeke gï molenge senge, me mbi yeke mû maboko na lo ti leke aye ni.’ David amû gbâ ti amosoro ti lo ti leke na temple ni. Lo gi azo so ahinga kua ni nzoni. Lo bungbi lor na argent, nga lo wara akeke ti cèdre so alondo na Tyr nga na Sidon. Na ngoi so David aga nduru ti kui, lo mû na Salomon plan ti lekengo temple ni. Lo tene na lo: ‘Jéhovah la ahunda na mbi ti sû aye ni so na mbeti ndali ti mo. Jéhovah ayeke mû ande maboko na mo. Sara mbeto ape. Luti tongana koli na sara kua ni.’