Saaooli reyita Daawiti moohi. Hakkawoyite isira 30 diro ikkannosi. Isi moohihunni shiimu diri gedensaanni, mitto barra hawarro gashshootu minisi aana heeꞌre mitte xuma mancho lai. Daawiti manchote suꞌmi Bersaabehi ikkinotanna ise Ooriyo yinanni olamaanchi galte ikkitinota xaꞌmisiise afi. Daawiti Bersaabehi gashshootu minisira abbisiisi. Hakkiinni Daawiti Bersaabehi ledo fooreenna ise godobbu. Daawiti assinore maaxate woꞌnaalino. Qoleno Daawiti olamaasinete roorrichira, Ooriyo olaho xaawate woranno gedenna wole olanto hakkiinni hoꞌlitanno gede kulisi. Ooriyo olunniwa reyita Daawiti Bersaabehi adhi.

Yihowa kayinni Daawiti assinoha busha coye baala laino. Yihowa maa assinoro afootto? Isi Naataani yinanni masaalaancho Daawitiwa soyino. Naataani Daawitira togo yii: ‘Mittu katamira lowo geꞌreewi noosihu dureessu manchinna mitte lowo geeshsha baxanno wiliiꞌlicho calla noosihu buxichu manchi heeꞌranno. Hakkiinni dureessu manchi buxichu manchi wiliiꞌlicho adhi.’ Daawiti lowo geeshsha hanqe, ‘Hakku manchi reya hasiissannosi!’ yii. Hakkiinni Naataani Daawiti, ‘Hakku dureessu manchi ateeti!’ yii. Daawiti lowo geeshsha dadille Naataanira, ‘Yihowa albaanni cubbo loosoommo’ yii. Kuni cubbi Daawitinna minisi mannira lowo qarra abbino. Yihowa Daawiti qorichishino; kayinni Daawiti ammanaminohanna umosi heeshshi assannoha ikkino daafira lubbote heeꞌranno gede assino.

Daawiti Yihowara qullaawa mine mina hasiꞌri; Yihowa kayinni qullaawa mine minannosi gede Daawiti beetto Selemooni doodhi. Daawiti  Selemoonira qullaawa mine minate kaaꞌlannore qixxeessanni togo yii: ‘Yihowahu qullaawu mini biifadonna ayirrado ikka hasiissannosi. Kayinni Selemooni anje afiꞌrino daafira, hasiisannore qixxeesseemmosi.’ Daawiti qullaawa mine minnanni gede lowo woxe uyino. Isira ogeeyye loosaasine noosi. Qoleno Daawiti culkanna camo gamba assino; hattono Xiroosinna Sidoona yinanni gobbanni daguwu haqqe abbisiisino. Daawiti reyanno yanna iillituta, Selemoonira qullaawa mine minanno gara kulisi. Togo yiisi: ‘Kuni baalunku Yihowa qullaawa minesi minnanni gede, borrotenni uyinoe akeekaati. Isi kaaꞌlannohena waajjitooti. Waajja agurte looso hanafi.’