Nanjary mpanjaka Davida lafa nimaty Saoly. Telopolo tao Davida tamy zay. Nandehandeha tanaboni-tranony eny ie ndraiky haly, le nahajilo ampelasoa raiky. Tsy ela tafarani-zay, le nihainy hoe Batseba ty anarani-ampela io, sady valini-maramila raiky kaihy hoe Oria. Nampiavini-Davida an-tranony ao Batseba, le nanao firaisa rozy, bakeo nibevoka Batseba. Teani-Davida havony ty raha nataony. Nivolaniny amy zay ty sefoni-maramilany hoe: ‘Alefaso amy farany aloha any Oria lafa mialy nareo, bakeo engao eny.’ Nimaty tany Oria! Nivalìni-Davida amy zay Batseba.

Ino ty nataoni-Jehovah lafa nahita raha raty reo? Nirahiny ho amy Davida any Natana mpaminany, le nivola hoe: ‘Nisy lahilahy mpanarivo zay nana aondry maro biby. Nisy lahilahy mahantra koa tsy nana laha tsy aondry raiky avao. Teany biby aondriny io. Fe nalani-lahilahy mpanarivo iny raha iny.’ Neloky biby Davida, le nivola hoe: ‘Tokony hovonoa lahilahy mpanarivo zay!’ Le hoy Natana: ‘Iha any lahilahy mpanarivo ’o!’ Nalahelo biby Davida. Nieky ie hoe: ‘Nanota tamy Jehovah aho.’ Nahavy fahasahirana maro tamy Davida noho ty fianakaviany fahotany zay. Nisazini-Jehovah Davida, fe tsy nivonoany satria nivola ty marina sady niambany.

Ta hanamboatsy tempoly ho ani-Jehovah Davida, fe Solomona ro nifilini-Jehovah hanamboatsy azy. Le hoy ty asani-Davida: ‘Tsy maintsy atao soa biby ty tranoni-Jehovah, kanefa Solomona mbo ajà marè. Aleo hataoko parè ho azy iaby ty raha iaby.’ Nanome drala  maro amy zay Davida. Nila mpiasa mahay ie. Namory volamena noho volafoty koa ie, le nanafatsy hazo Sedera baka a Tyro noho Sidona any. Lafa narìny ho maty amy zay ie, le nameany ani-Solomona ty ho pozini-trano iny. Hoy ty asany: ‘Nampanovini-Jehovah ahy raha toy mba ho anao. Ka matahotsy fa hanampy anao Jehovah. Mahereza! Anovo asa io.’