Su tempong i Saul nate, Daud nakoạ datu. Su tempo ene umure 30 su su taunge. Su tempong seng pira taung nakoạ datu, Daud někoạ pẹ̌sasal᷊a gěguwạ. Piạ su sěhěbi, i sie nakasilo wawine masadadạ bọu wowong istanane. Daud nakasingkạ wawine ene arenge Bat-syeba, kawingu sěngkatau prajurit arenge i Uria. Daud něngoro si Bat-syeba sarang istanane. Bọu ene i rẹ̌dua někoạ hubungan seks, kụ i Bat-syeba natiang. Daud mapulu měmuni apa seng nikoạe. I sie něngoro panglima pasukan pẹ̌taho si Uria su bageang mukane su tempong mẹ̌pěrang, kụ pěněntang si Uria sẹ̌sane. Su tempong i Uria seng nate su perang, Daud nẹ̌kawing dingangi Bat-syeba.

Katewe Yehuwa nakasilo kěbị ene. Apa nikoạ i Yehuwa? I sie něngoro si Nabi Natan patamai sarang i Daud. Natan naul᷊ị, ’Piạ tau kalạ kụ dombane sěbạe mal᷊awọ, bọu ene piạ tau masusah kụ dombane kětạeng sěmbaụ kadodọ. I sie masayang su dombane ene. Bọu ene, tau kalạ ene něngal᷊ạ dombang tau masusah.’ Daud nẹ̌pědu kụ naul᷊ị, ’Tau kalạ ene harusẹ̌ pateng!’ Bọu ene Natan naul᷊ị, ’I kau tau kalạ ene!’ Daud sěbạe nasusah naung, kụ i sie něngaku si Natan, ’Iạ seng někoạ dosa si Yehuwa.’ Ual᷊ingu dosane ene, Daud dingangu kěluargane nakaěbạ lawọ masalah. Yehuwa něhukung si Daud. Katewe Yehuwa tawe něgělị hukumang papate ual᷊ingu i Daud jujurẹ̌ dingangu masanạ naung.

 Daud mapulu měkoạ bait gunang Yehuwa. Katewe, Yehuwa němile si Salomo anạ i Daud gunang měkoạ ene. Daud něnadia bahan sarung pakẹtang i Salomo kụ nẹ̌bera, ’Bait i Yehuwa harusẹ̌ sěbạe mapaelẹ̌. Salomo bědang mangudạ, katewe iạ sarung mẹ̌tul᷊ung si sie měnadia kěbị bahan pakẹtang.’ Daud něgělị lawọ doite gunang měkoạ bait. I sie nědeạ lawọ basẹ̌ mapaelẹ̌. I sie něnampung masẹ̌ dingangu perak, lai něngoro taumata pẹ̌bawa kalung aras bọu Tirus dingangu Sidon.