Depois Saul mate, David mak sai liurai kuandu nia tinan 30. Liutiha tinan balu, nia halo sala boot tebes. Kalan ida, nia haree feto bonita ida husi ninia palásiu. Ikusmai David hatene katak feto neʼe naran Bat-Seba, tropa ida naran Urias nia feen. David haruka Bat-Seba bá ninia palásiu no halo relasaun seksuál no feto neʼe sai isin-rua. David koko atu subar ninia sala. Nia haruka tropa nia ulun-naʼin atu tau Urias iha oin iha fatin neʼebé sira halo funu no husik hela nia mesak. Depois Urias mate tiha iha funu, David kaben ho Bat-Seba.

Jeová haree buat aat hotu neʼebé akontese. Saida mak nia sei halo? Jeová haruka profeta Natan atu bá hasoru David. Natan hatete: ‘Mane riku ida iha bibi-malae barak, no mane kiak ida iha deʼit bibi-oan ida no nia hadomi tebes bibi neʼe. Mane riku neʼe foti tiha mane kiak neʼe nia bibi-oan.’ David sai hirus tebes no dehan: ‘Mane riku neʼe merese mate!’ Entaun Natan dehan: ‘Ita-Boot mak mane riku neʼe!’ David sai laran-kanek no hatete ba Natan: ‘Haʼu halo ona sala hasoru Jeová.’ Sala neʼe lori susar ba David no ninia família. Jeová fó kastigu ba David maibé husik hela nia moris tanba nia laran-moos no haraik an.

David hakarak harii templu ba Jeová, maibé Jeová hili David nia oan-mane Salomão mak atu harii templu. David komesa  prepara buat hotu ba Salomão no hatete: ‘Jeová nia templu tenkesér kapás tebes. Salomão sei joven hela, haʼu sei ajuda nia atu prepara buat hotu.’ David fó osan barak atu harii templu neʼe. Nia buka badaen sira neʼebé iha esperiénsia. Nia halibur osan-mean no osan-mutin, no mós sosa ai-sedru husi Tiro no Sidon. Bainhira David besik atu mate, nia entrega dezeñu kona-ba templu ba Salomão. Nia hatete: ‘Jeová mak dirije haʼu atu hakerek kona-ba planu hotu neʼe ba ó. Jeová sei ajuda ó. Keta taʼuk. Sai forte bá no halo serbisu.’