Nanjare mpanjaka ty Davida naho fa mate ty Saoly. Telopolo taogne reke tamy izay. Nahatalake ampela soa reke tie indraike hariva. Fanta i Davida amy izay tie i Batseba ty agnara’e, le i Oria maramila ty vali’e. Nampangalae’e ty Batseba, le nanao firaisagne iareo. Nivesatse ty Batseba. Te hagnetake ty raha natao’e ty Davida, le hoe reke tamy i zenerali’ey: ‘Anò aloha i alỳ ey ty Oria, le engao eo.’ Nalae’e ho valy amy izay ty Batseba naho fa nimate ty Oria.

Nahavazoho izay ty Jehovah, le nagnirake i Natana mpaminany ho amy i Davida agne. Hoe reke: ‘Nanagne agnondry maro ty lahilahy raike mpagnarivo, le nanagne raike avao ty lahilahy mahantra. Faie nalae i mpagnarivoy ty agnondry i mahantray.’ Boseke ty Davida le nirehake tie: ‘Fagneva ty hovonoegne ze ndaty zay!’ Hoe ty Natana: ‘Ihe o mpagnarivo zao!’ Nanahelo mafe ty Davida, le hoe reke: ‘Nanota tamy i Jehovah raho.’ Niterake olagne ho aze naho ty keleia’e ze fahotagne zay. Sinaze i Jehovah ty Davida, faie tsy vinono’e satria nifogne naho niambane reke.

Te hamboatse tempoly hoahy i Jehovah ty Davida faie i Solomona ty teà i Jehovah hamboatse aze. Fa namory ty raha hamboara i Solomona aze avao ty Davida, le hoe reke: ‘Tsy maintsy atao fanjaka ty tempoly i Jehovah. I Solomona ka mbe kede, faie hampeako reke mba ho vognogne amy izay.’ Nagnomey drala maro ty Davida sady nipay mpiasa mahay. Namory volamena naho volafotsy ka reke, sady  nagnafatse hatae sedera boake a Tyro agne naho a Sidona agne. Naho fa narine ho mate reke, le nimea’e i Solomona ty sare ho pozipozy i tempolỳ. Hoe reke: ‘Nampanoe i Jehovah ahy ho azo ty sare ho pozipozy i tempolỳ. Ko matahotse fa hagnampe azo ty Jehovah. Mahereza, le amboaro i tempolỳ.’