THUTO 43
Kgosi Dafide o a Leofa
Fa Saulo a sena go swa, Dafide o ne a nna kgosi. O ne a na le dingwaga di le 30. Morago ga dingwaga di le mmalwa e le kgosi, o ne a ema mo marulelong a ntlo ya gagwe ya segosi mme a bona mosadi yo montle. Dafide o ne a bolelelwa gore leina la mosadi yoo ke Bathesheba le gore o nyetswe ke lesole le le bidiwang Uria. Dafide o ne a laletsa Bathesheba mo ntlong ya gagwe. Ba ne ba tlhakanela dikobo mme Bathesheba a ima. Dafide o ne a leka go fitlha se a se dirileng. O ne a laela molaodi wa masole gore a beye Uria kwa pele mo ntweng mme go se ka ga nna le ope yo o mo thusang. Fa Uria a sena go bolawa kwa ntweng, Dafide o ne a nyala Bathesheba.
Mme Jehofa o ne a bone se Dafide a se dirileng. O ne a dira eng? Jehofa o ne a romela moporofeti Nathane gore a ye kwa go Dafide. Nathane o ne a raya Dafide a re: ‘Monna mongwe wa mohumi o ne a na le dinku tse dintsi mme monna wa mohumanegi o ne a na le kwanyana e a neng a e rata thata. Monna wa mohumi o ne a tsaya kwanyana eo.’ Dafide o ne a galefa mme a re: ‘Monna yoo o tshwanetse go swa!’ Nathane o ne a raya Dafide a re: ‘Ke wena monna yoo!’ Dafide o ne a utlwile botlhoko thata mme a raya Nathane a re: ‘Ke leofetse Jehofa.’ Boleo joo bo ne jwa tsenya Dafide le lelapa la gagwe mo mathateng a mantsi. Jehofa o ne a otlhaya Dafide mme ga a ka a mmolaya ka gonne Dafide o ne a ikanyega e bile a sa itseele kwa godimo.
Dafide o ne a batla go agela Jehofa tempele mme Jehofa o ne a tlhopha ngwana wa gagwe e bong Solomone gore e nne ene a e agang. Dafide o ne a rulaganya dilo tsa go aga mme a re: ‘Tempele ya ga Jehofa e tshwanetse go nna lefelo le lentle thata. Solomone o sa ntse a le monnye mme ke tla mo thusa go baakanya dilo tse a tla di tlhokang.’ Dafide o ne a ntsha madi a mantsi gore go agiwe tempele. O ne a batla gore tempele e agiwe ke badiri ba ba nang le bokgoni. O ne a kokoanya gouta le selefera mme a reka logong lwa maemo a a kwa godimo go tswa kwa Ture le Sidona. Pele Dafide a swa, o ne a naya Solomone dipolane tsa tempele eo. A bo a re: ‘Jehofa o ne a ntaela gore ke go di kwalele. Jehofa o tla go thusa. O se ka wa tshoga. Nna pelokgale mme o simolole go aga.’
“Motho yo o bipang ditlolo tsa gagwe ga a kitla a atlega, mme ope fela yo o ipolelang a bo a di tlogela o tla utlwelwa botlhoko.”—Diane 28:13
Tse Dingwe Tse O ka Di Kgatlhegelang
DIKARATA TSA BATHO BA MO BAEBELENG
Karata ya Baebele ya Dafide
O ka tswa o itse ka kgang ya ga Dafide le Goliathe mme o ka ithuta go le gontsi mo go yone ka ga Dafide.
DIBIDIO TSOTLHE
Dafide—O ne A Ikanya Modimo
Dafide o ne a dira diphoso mo botshelong jwa gagwe, a lebana le dikgwetlho tse dintsi mme ga a ka a kgaotsa go direla Jehofa. Sekao sa gagwe se se molemo se tla go thusa gore o nne o ikanyega.
DIPOROJEKE TSA GO ITHUTA BAEBELE
Ikele Tlhoko Gore O se Ka wa Nna le Dikeletso Tse di sa Siamang
Dirang porojeke eno mme lo bone kgang ya ga Dafide le Bathesheba ka leitlho la mogopolo. Re ka ithuta dilo dife mo go yone?
DIPOROJEKE TSA GO ITHUTA BAEBELE
Amogela Kgakololo ka Boikokobetso
O ka ithuta eng mo tseleng e Nathane a neng a bua le Dafide ka yone fa a mo gakolola?
