Sauli wati wafwa, Davidi wanguja fumu. Iyu wenga ndi vyaka 30. Wati walamuliya kwa vyaka vinandiku, wanguchita chinthu chinyaki chiheni ukongwa. Zuŵa linyaki ndi usiku we pachanya pa nyumba yaki yachifumu, wanguwona munthukazi wakutowa. Davidi wanguvwa kuti munthukazi yo wenga Betesheba, muwolu waku Uriya yo wenga msilikali. Davidi wangudanisa Betesheba kuti wazi kunyumba kwaki. Iyu wangugonana nayu ndipu wanguja ndi nthumbu. Davidi wanguyesesa kubisa vo wanguchita. Iyu wangukambiya mura wa asilikali kuti pa nyengu ya nkhondu, akaŵiki Uriya pa mzeri wakwamba wa asilikali ndipu wosi akawere vuli kuti wakaje yija. Uriya wati wabayika ku nkhondu, Davidi wangutorana ndi Betesheba.

Yehova wanguwona vinthu vosi viheni vo vinguchitika. Kumbi watingi wachitengenji? Yehova wangutuma mchimi Natani kwaku Davidi. Natani wanguti: ‘Penga munthu munyaki wakukhupuka yo wenga ndi mbereri zinandi ndipu munyaki mukavu wenga ndi mwana wa mbereri yumoza yo wamuyanjanga ukongwa. Munthu wakukhupuka wanguto mwana wa mbereri wa munthu mukavu.’ Davidi wangukwiya ndipu wangukamba kuti: ‘Munthu wakukhupuka yo ngwakwenere kubayika!’ Natani wangukambiya Davidi kuti: ‘Munthu wakukhupuka yo ndiwi!’ Davidi wanguchita chitima ndipu wangukambiya Natani kuti: ‘Ndanangiya Yehova.’ Ubudi uwu ungumuzisiya masuzgu nganandi Davidi ndi ŵanthu a mubanja laki. Yehova wangumulanga kweni wangumubaya cha chifukwa wangukamba uneneska ndipuso wangujiyuyuwa.

Davidi wakhumbanga kuzenga nyumba yakusopiyamu kweni Yehova wangusankha mwana waku Davidi, Solomoni kuti ndiyu wazengi. Davidi wangwamba kuwunganisa vinthu kuti wapasi Solomoni ndipu  wangumukambiya kuti: ‘Nyumba yakusopiyamu Yehova yikhumbika kuja yakutowa ukongwa. Solomoni weche munamana kweni ndimuwovyengi kuwunganisa vinthu.’ Davidi wangupereka ndalama zinandi kuti ziwovyi pa ntchitu yakuzenga. Iyu wangusaniya ŵanthu alusu. Wanguwunganisa golidi ndi siliva ndipu wangudanisa vimiti va milanji kutuliya ku Turo ndi ku Sidoni. Davidi we pafupi kufwa, wangupasa Solomoni pulani kuti wazengi nyumba yakusopiyamu. Iyu wanguti: ‘Yehova wandikambiya kuti ndikulembe vinthu ivi. Yehova wakuwovyengi. Ungachitanga mantha cha. Uje ndi nthazi ndipu ugwiri ntchitu iyi.’