Saulo obuyafiire, Daudi nuwe yafokere omukama. Akaba aine emyaka 30. Hanyuma y’okumara emyaka ali mukama, kiro kimu omu kairirizi Daudi obwakaba ayemerire ha rusu rw’ekikaali kye akarora omukazi omurungi. Obu yaseruliriize ebirukukwata hali omukazi onu, bakamugambira ngu ibara lye nuwe Basiseba kandi iba akaba ali muserikale arukwetwa Uliya. Daudi akatuma balete Basiseba omu kikaali kye. Akaterana nauwe, kandi omukazi onu akatwara enda. Daudi akalengaho kusereka ekintu kinu. Akaragira omudumizi w’ihe lye ngu obu baraba nibarwana obulemu, ate Uliya omu maiso kandi bamwecweho nukwo aitwe. Uliya obu yaisirwe omu bulemu, Daudi akaswera Basiseba.

Ebintu binu byona Yahwe akabirora. Akaba n’agenda kukora ki? Yahwe akatuma nabbi Nasani kugenda hali Daudi. Nasani akamugambira ati: ‘Omusaija omu omuguuda, akaba aine entaama nyingi kandi omusaija ondi omunaku akaba aine akataama kamu konka, akato kandi akayagonzaga muno. Omuguuda akatwara akataama k’omusaija omunaku.’ Ekintu kinu kikabihiza muno Daudi yagamba ati: ‘Omusaija ogu omuguuda asemeriire kwitwa!’ Nasani akagambira Daudi ati: ‘Niiwe omusaija ogu omuguuda!’ Daudi akehurra kubi muno habw’ekintu eki yakozere nukwo kugambira Nasani ati: ‘Nsisire hali Yahwe.’ Ekibi kinu kikaletera Daudi n’eka ye ebizibu by’amaani. Yahwe akafubira Daudi baitu atamwite, habwokuba akaikiriza ensobi ye kandi akebundaza.

Daudi akaba nagonza kwombekera Yahwe yekaru baitu Yahwe akakoma omwana we arukwetwa Sulemani nuwe agyombeke. Daudi akatandika kutekaniriza Sulemani ebintu by’okukozesa kwombeka kandi yagamba ati:  ‘Yekaru ya Yahwe esemeriire kuzooka kurungi muno kukira ekintu kindi kyona. Baitu Sulemani akyali muto, nahabweki ninyija kumukonyera mutungire ebintu by’okukozesa.’ Daudi akahayo sente nyingi eze habwe nukwo zikonyere omu kwombeka. Akaserra abakozi abakugu muno, yasorooza ezabu, efeza, kandi yatuma balete emiti y’emikogoto kuruga omu Turo n’omu Zidoni. Daudi obwakaba ali haihi kufa, akaha Sulemani entekaniza zoona ez’okwombeka yekaru. Kandi akamugambira ati: ‘Yahwe akandagira kukuhandikira ebintu binu. Yahwe n’aija kukukonyera, otatiina. Fooka w’amaani kandi oyombeke yekaru.’