Musi Saulo a tshi fa, Davida o vha khosi. O vha e na miṅwaha ya 30. Musi o no vha khosi lwa miṅwaha minzhi, vhuṅwe vhusiku musi e kha ṱhanga ya nnḓu yawe, a vhona mufumakadzi wa lunako. Davida a wana u ri dzina ḽawe ndi Batseba na uri o vha o vhingiwa nga Uria we a vha e swole. Davida a ita uri Batseba a ḓiswe nḓuni yawe. Vha ita zwa vhudzekani, nahone a mbo ḓi vhifha muvhilini. Davida o lingedza u dzumba zwe a ita. O vhudza mulanga mmbi wawe uri a vhee Uria phanḓa hune nndwa ya vha khulu nahone vha mu laṱedze. Musi Uria o no fa e nndwani, Davida a vhinga Batseba.

Fhedzi Yehova o vhona vhuvhi hoṱhe he ha bvelela. O vha a tshi ḓo ita mini? Yehova o ruma muporofita Nathani ha Davida. Nathani a ri: ‘Munna wa mupfumi o vha e na nngu nnzhi, nahone munna wa mushai o vha ene ngwana nthihi ine a i funesa. Munna wa mupfumi a dzhia ngwana nthihi ya mushai.’ Davida a sinyuwa vhukuma nahone a ri: ‘Munna wa mupfumi o tea u fa!’ Nathani a vhudza Davida a ri: ‘Munna wa mupfumi ndi inwi.’ Mbilu ya Davida ya vhavha, nahone a tenda kha Nathani a ri: ‘Ndo tshinya kha Yehova.’ Hetshi tshivhi tsho ḓisela Davida na muṱa wawe khakhathi nnzhi. Yehova o dzhiela vhukando Davida fhedzi a si mu vhulahe nga u ri o vha a tshi fulufhedzea na u ḓiṱukufhadza.

Davida o vha a tshi ṱoḓa u fhaṱela Yehova thembele, fhedzi Yehova a khetha Salomo, ṅwana wa Davida uri a fhaṱe thembele. Davida a thoma u dzudzanyela Salomo thundu ya u fhaṱa nahone a  ri: ‘Thembele ya Yehova i tea u naka vhukuma. Salomo u tshee muṱuku, fhedzi ndi ḓo mu thusa u kuvhanganya thundu ya u fhaṱa.’ Davida o ṋeela nga tshelede yawe nnzhi u itela mushumo wa u fhaṱa. O wana na vhafhaṱi vha re na vhukoni. O kuvhanganya musuku na siliva, nahone a ḓisa miṱaululo i bvaho Tiro na Sidoni. Musi e tsini na u fa, Davida o fha Salomo pulane dza tshifhaṱo tsha thembele. A ri: ‘Yehova o ri ndi ni ṅwalele hezwi zwithu. Yehova u ḓo ni thusa. Ni songo ofha. Ivhani na tshivhindi nahone ni thome mushumo.’