Kamatay ni Saul, hi David an nagin hadi. Trenta anyos hiya. Paglabay hin pipira ka tuig, nakakita hiya hin mahusay nga babaye samtang usa ka gab-i nakadto hiya ha atop han iya palasyo. Hinbaroan ni David nga hiya hi Batseba nga asawa han sundalo nga hi Uria. Ginpakadto ni David hi Batseba ha iya palasyo. Nagkaada hira seksuwal nga relasyon, ngan nagburod hi Batseba. Nangalimbasog hi David nga itago an iya ginbuhat. Ginsidngan niya an iya heneral nga ha panahon han araway, ibutang hi Uria ha prente nga linya tapos paatrason an mga sundalo nga upod niya. Kamatay ni Uria ha girra, nagin asawa ni David hi Batseba.

Pero nakita ni Jehova ito nga karaotan. Ano an iya bubuhaton? Ginpakadto niya hi propeta Natan kan David. Hi Natan nagsiring: ‘May riko nga lalaki nga damu an karnero, ngan may pobre nga lalaki nga usa la an nati nga karnero nga hinigugma gud niya. Ginkuha han riko an nag-uusahan la nga karnero han pobre nga lalaki.’ Nasina hi David ngan nagsiring: ‘Ito nga riko nga lalaki angay mamatay!’ Dida hito ginsidngan ni Natan hi David: ‘Ikaw ito nga riko nga lalaki!’ Nasubo gud hi David ngan nagsiring kan Natan: ‘Nakasala ako kan Jehova.’ Tungod hito nga sala, hi David ngan an iya pamilya nagkaada damu nga problema. Ginsirotan hiya ni Jehova, pero waray hiya pataya kay tangkod hiya ngan mapainubsanon.

Karuyag ni David maghimo hin templo para kan Jehova, pero an iya anak nga hi Solomon an ginpili ni Jehova nga magtukod hito. Nagtikang hiya mag-andam han mga kinahanglanon ni Solomon ngan nagsiring: ‘An templo ni Jehova kinahanglan magin maopay gud. Bata pa hi Solomon,  salit bubuligan ko hiya nga iandam an mga kinahanglanon.’ Naghatag hi David hin damu nga kwarta para ha pagtukod. Nag-organisar hiya hin maabilidad nga mga trabahador. Nagtirok hiya hin bulawan ngan silber, ngan nagkuha hin mga kahoy nga sedro tikang ha Tiro ngan Sidon. Han hirani na mamatay hi David, iginhatag niya kan Solomon an mga plano ha pagtukod. Hiya nagsiring: ‘Iginpasurat ini ni Jehova ha akon para ha imo. Bubuligan ka ni Jehova. Ayaw kahadlok. Pagin marig-on ngan tikangi dayon an trabaho.’