Sauli ali awile, Daudi jwaŵele mwenye. Pandaŵiji ŵakwete yaka 30. Daudi ali alamulile kwa yaka yejinji, lisiku line ca kwigulo jwakwesile penani panyumba jakwe ja ucimwene. Ali penanipo, jwam’weni jwamkongwe jwakusalala. Lina lyakwe jwaliji Batiseba jwaŵaliji paulombela ni msilikali jwine lina lyakwe Uliya. Daudi ŵam’ŵilasile jwamkongwejo kunyumba jakwe ja ucimwene. Jemanjajo ŵatesile cikululu, soni Batiseba jwakwete citumbo. Daudi ŵalinjile kusisa yakulemwa yaŵatesile. Jwalakwe jwamsalile jwamkulungwa jwa asilikali ŵakwe kuti akam’ŵice Uliya kusogolo pandaŵi ja ngondo. Ŵasasilesoni kuti, asilikali ŵane akawujile munyuma kuti jwalakwejo akawulajidwe. Uliya ali awulajidwe kungondo, Daudi ŵamlombile Batiseba.

Nambo Yehofa ŵayiweni yindu yakusakala yayatendekweyo. Ana jwalakwe ŵatesile cici? Yehofa ŵamtumisye jwakulocesya Natani kwa Daudi. Jwalakwe jwatite, ‘Mundu jwine jwakusicila jwakwete ngondolo syejinji, soni mundu jwine jwakulaga jwakwete kamwanace kamo kangondolo kaŵakanonyelaga mnope. Mundu jwakusicila jula jwajigele kamwanace kangondolo ka mundu jwakulaga jula.’ Yeleyi yamtumbilikasisye mnope Daudi mwamti jwatite. ‘Mundu jwakusicila jweleju akusosekwa kuwulajidwa!’ Kaneko Natani jwamsalile Daudi kuti, ‘Mundu jwakusicilajo mli mmwejo.’ Pelapa Daudi ŵalitendele canasa, ni ŵamsalile Natani kuti, ‘Ndemwisye pameso pa Yehofa.’ Ulemwa waŵatesile Daudi watendekasisye kuti jwalakwe soni ŵamwiŵasa mwakwe asimane ni yakusawusya. Yehofa ŵampele cilango Daudi nambo nganam’wulaga ligongo lyakuti ŵalosisye cilungamo soni kulinandiya.

Daudi ŵasakaga kutaŵa nyumba jakulambilila ja Yehofa, nambo Yehofa ŵamsagwile Solomoni juŵaliji mwanace jwa Daudi kuti ataŵe  nyumbajo. Daudi jwatandite kusonganganya yindu yacacikamulicisya masengo Solomoni ni jwatite, ‘Nyumba jakulambilila ja Yehofa jikusosekwa cijiŵe jakusalala. Solomoni nganaŵe kula, nambo cinamkamucisye mwakusonganya cile yindu yacacikamulicisya masengo.’ Daudi jwapelece mbiya syejinji pakamucisya masengogo. Jwapatile ŵakamula masengo ŵakumanyilila cenene. Jwasongangenyesoni golide, silifa, soni jwasumile matabwa kutyocela ku Tulo ni ku Sidoni. Ali asigele panandi kuwa, Daudi ŵamsalile Solomoni kataŵe ka nyumba jakulambilila. Jwatite, ‘Yehofa ŵasalile kulemba yindu yeleyi kuti cimyikamulicisye masengo. Yehofa cacimkamucisya. Mkatenda woga, mkamule masengoga mwakulimbangana.’