Ho Saura akpi ni, Davide ada ni bakindo. Garãko adu 30. Fuo ko dani bakindo tipa bete agarã, rogo kura nyemu sa, ko aguari auru gako barame, ki nita rii gako bambu yo na ko ki bi bawene dee. Davide asanahe tipa ri ki bi gupai nga rimo ri angia Bataseba ni dia gu banzengere nangia Uria. Davide akedi sunge i ye na Bataseba ku kpuko yo. Ko akodiba na ri, na ri kidu na gude. Davide aˈasadi ka oka gupai ko amangihe re. Ko aya fu gako barutiriivura wẽ, ko ndu na Uria kutingba vurayo ki mbuko yo. Tingbafuo i imi Uria tingba vurayo, Davide ki di Bataseba ni diako.

Ono Yekova aima bi gu gbegberẽ apai dunduko nga gu namangi re. Ginipai ko arengbe ka mangaha? Yekova akedi gu nabi nangia Natana fuo Davide. Natana aya: ‘Kumukokumuko kumba adu na dungu akandoro beko, na rungorungo kumba ki du na kandoro beko gbua kina sa nga guru ko akpinyemu ru akpi gbe. Gu kumukokumuko kumba re adi ga gu rungorungo kumba re bangisa kandoro.’ Davide azingi ni kerehe ki ya: ‘Si ima rẽ ko kpi!’ Natana aya fu Davide wẽ: ‘Mo du nga gu kumukokumuko kumba re!’ Davide adu ni fudifudiko gbe, na ko ki idihe fu Natana nga: ‘Mi ima ingapai kuti Yekova.’ Gi ingapai re aima ye na kpakaraapai kurii Davide gbiati gako aborokporo. Yekova afu mbusa fu Davide ono zanga imoko mbiko ko aima idapa gako ingapai na ki umbasi patiko.

Davide aaida ka dua yekaru fu Yekova, ono Yekova asia wiri Davide nangia Soromo ko duaha. Davide atona ka ye na agu ahe si aaidaha fu Soromo na ki ya: ‘Ga Yekova bambu du wa ka sidu ni bawenehe  gbe. Soromo kindi nga tooni gude, ono mi nika undoko niye mi na agu ahe si aidaha tipaha.’ Davide afu kina boro gako marã ni bakerehe gbe tipa sunge me he. Ko aye na agu aboro du na birĩ tipa ngbatunga asunge dunduko. Ko aye na dahabu na feda gbiati gu ngua kedara ko aye na ni Tura yo na Sidona yo. Ho Davide aambeda ni ka kpi, ko afu kpia gu yekaru re fu Soromo wai ko nika duaha. Ko aya: ‘Yekova arugu re mi keke agi apai re dunduko foro. Yekova nika undo ro aundo. Ka mo gundenga ya. Mo du nyanyaki na ki mangihe.’