I ng’ei ma Suleman udoko ubimo mir Israel, Yehova upenje kumae: ‘Imaru amii iri ang’o?’ Suleman udwoko ire kumae: ‘Fodi atie nyathin man ang’eyo ngo gin m’ukwayu atim. Kan ecopere, mii ira rieko kara atel wi dhanu peri cuu.’ Yehova uyero ire kumae: ‘Calu ikwayu amii iri rieko, abiketho ibibedo riek nisagu dhanu ceke m’i wi ng’om. Abiketho bende ibilony lee mandha. Man kan iworo lembe m’ayero, ibikwo nindo dupa.’

E Suleman ucaku giero hekalu. Etio ku mola ma kwar, ma tar, yen, man kidi ma pigi tek pi giedone. Jumaco ku jumamon dupa ma jubodho gidiko cing’gi i kum giedo mir hekalu. I ng’ei oro abiro, giedo mir hekalune uthum man saa mi thiere ni Yehova ugam uromo. E juketho lam ma jubithiero iwi pemblam mir hekalune. Suleman urum i wang’ pemblam man erwo kumae: ‘E Yehova kadok hekalu maeni dwong’ man etie leng’ de, re eromo kudi ngo, ento akweyi, jol thier mwa man winj rwo mwa.’ Nyo Yehova uyio hekalu man ewinjo rwo pa Suleman? Kinde ma Suleman udaru rwo pare tap ci, e mac uloro kud i polo man uwang’u lam m’ubino iwi pemblam. I ayi maeno re ma Yehova unyutho nia eyio hekalune. Saa ma Juisrael gineno lembe maeno, anyong’a negogi magwei.

Dhanu mir Israel ceke ku mi kabedo ma bor de gigam ging’eyo pi rieko p’ubimo Suleman. Ju ma dupa ubed ubino i bang’e kara ekonygi ku yiko lembe migi. Kadok ubimo ma dhaku mi Ceba de ubin upenjo Suleman ku penji dupa ma tek. Kinde m’ewinjo kite ma Suleman udwoko ko wang’ penji pare, eyero kumae: ‘Saa ma dhanu ukoro piri ira, ayio ngo. Ento kawoni abeneno nia rieko peri tie lee nisagu ma gikoro. Yehova Mungu peri mio iri mugisa andha.’ Juisrael ceke gikwo ma ber man gibino ku mutoro. Ento lembe ubin ulokere.