Salomonajj Israel marka apnaqañ qalltkäna ukhajja, Jehová Diosajj akham sänwa: ‘¿Kunsa churirisma?’ sasa. Salomonajj sarakïnwa: ‘Waynitüsktwa, janiw kuns sum lurañ yatkti. Markamar cuidañatak yatiñay churita’ sasa. Diosajj sänwa: ‘Niyakejjay yatiñ maychistajja, yatiñaniruw tukuyäma, wali qamirirakïyätawa. Istʼitäta ukhasti walja maranakaw jakarakïta’ sasa.

Salomonajj templo lurañwa qalltäna. Qorimpi, qollqempi, maderampi ukhamarak suma qalanakampiw luräna. Yatjjattʼat walja chachanaka warminakaw trabajipjjäna. Paqallqo maratwa tukuyapjjäna. Jehová Diosar katuyapkäna uka urojja, ofrendanakwa altarar uchapjjäna. Salomonajj altar nayraqatar qonqortʼasisaw akham orasïna: ‘Jehová Dios Tata, aka templojj janiw jumatakjama wali sumäkiti, ni wali jachʼäkisa. Ukampis mirä amp suma, jumar adoranipjjsma uk katoqtʼasipjjakitaya, oracionanakajsa istʼapjjakitaya’ sasa. ¿Jehová Diosajj templo uñjasasa, Salomonan oracionap istʼasasa kamspachänsa? Oración tukuyjjäna ukhajja, ninaw alajjpachat saraqanïna, ofrendanaksa qʼal nakhantäna. Ukhamatwa Diosajj kusisitätap uñachtʼayäna. Israelitanakajj uk uñjasajj wal kusisipjjarakïna.

Israel markansa yaqha markanakansa Salomón reyirojj wali yatiñanitwa uñtʼapjjäna. Jaqenakajj problemanakap askichañatakejj jupan ukaruw yanaptʼa mayir jutapjjäna. Seba (Sabá) markan reinapasa visitirejj jutarakïnwa. Wali chʼama jisktʼanakampi yantʼäna ukhas Salomonajj sum qhanañchäna. Ukatwa uka reinajj säna: ‘Kunanaktï jumat sapkitu uk janiw creykayätti. Jichhajj uñjawaytwa, sapkitäna ukat sipansa jukʼampi yatiñanïtawa. Juman Jehová Diosamaw wal bendistam’ sasa. Israel markanjja wali kusisita ukhamarak wali sumaw jakasipjjäna. Ukampis qhepat janiw ukhamäjjänti.