Ngéda Salômô a bi yila kiñe Israel, Yéhôva a bat nye le: ‘Kii u gwé ngôñ le me ti we?’ Salômô a timbhe nye le: ‘Me ngi yii mañge, me nyi bé lelaa me boñ. Soho, ti me pék inyu kena litén joñ.’ Yéhôva a kal nye le: ‘Inyule u mbat me pék, me ga yilha we mut nu a nlôôha bana pék hana isi. Me ga ti ki we soso lingwañ. Ndi ibale u nôgôl ki me, u ga niñ ngandak nwii.’

Salômô a bôdôl maoñ ma témpel. A bi bôñôl gôl, silba, bikék, ni ngok, bi bi bé biloñge ngandak. Dikôô di bôt di di bé yi gwel nson, bôda kiki bôlôm, di bi sal inyu maoñ ma témpel. I mbus nwii minsaambok, témpel i mal ôña; ngéda i bi kola le ba ti yo Yéhôva. Ba ligis bisesema i ngii juu li bisesema li témpel. Salômô a ôm maboñ bisu bi juu li bisesema, a kahal soohe: ‘A Yéhôva, bilama ni bikeñi bi témpel ini bi kôli bé inyu yoñ, ndi soho leege bibégés gwés, u emble ki masoohe més.’ Lelaa Yéhôva a bi tehe témpel ni masoohe ma Salômô? Kiki Salômô a mal ndik soohe, hié hi lôl i ngii, hi ligis bisesema bi bé ngii juu li bisesema. Hala a bé yimbne le témpel i nlémél Yéhôva. Kiki bon ba Israel ba tehe hala, ba kon maséé.

Kiñe Salômô a bé yiba inyu pék yé ikété loñ Israel yosôna, yak i minkoñ mi mi bé bo haa. Bôt ba bé ke tehe Salômô le a hôla bo i sañgal mam map. Kiñe muda i Séba yomede i bi lo i noode Salômô ni mambadga ma nlet. Ngéda kiñe muda i bi emble mandimbhe mé, i kal le: ‘Me bi hémle bé i mam bôt ba bé añle me inyu yoñ, ndi hanano me ntehe le u gwé yaga pék iloo kiki ba bi añle me. Nyambe woñ le Yéhôva, a bi sayap toi we.’ I si énél i Salômô, loñ Israel yosôna i bé ikété nsañ ni maséé. Ndi mam ma bé bebee i héñha.