Dung gabe raja ni Israel si Salomo, disungkun Jahowa ma ibana, ‘Aha ma pangidoanmu sian Ahu?’ Dialusi si Salomo ma, ‘Ndang huboto aha na laho siulahononku laho mangaradoti bangso on, alana poso dope ahu. Lehon ma tu ahu hapistaran.’ Didok Jahowa ma, ‘Ala dipangido ho hapistaran, bahenonku ma ho gabe halak na umpistar di tano on. Lehononku ma muse hamoraon. Jala molo dioloi ho Ahu, ganjang ma umurmu.’

Dibangun si Salomo ma bagas joro ni Debata. Dipangke do mas, perak, hau dohot batu permata na dumenggan. Marribu do baoa dohot borua na karejo disi. Dung pitu taon, sae ma bagas joro i jala dipestahon ma tu Jahowa. Adong do disi sada mezbah inganan manutung persembahan. Marsinggang ma si Salomo di jolo ni mezbah i jala martangiang ma ibana. Di tangiangna i didok ma, ‘Ale Jahowa, gelleng do nian bagas joro on di Ho. Alai jalo ma persembahannami on jala tangihon ma tangiangnami.’ Songon dia do dibahen Jahowa mangalusi tangiang ni si Salomo? Dung sae si Salomo martangiang, dibahen Jahowa ma api sian langit manutung persembahan i. Sian on, taboto ma na las do roha ni Jahowa mangida bagas joro i. Jala halak Israel pe marlas ni roha do mangida i.

Terkenal do Raja Salomo alani hapistaranna sahat tu inganan na dao. Sai ro do halak tu ibana mangido asa diurupi. Hea do ro ratu sian Seba manjumpangi ibana. Dibahen ma sungkun-sungkun na maol laho manguji ibana. Tingki dibege ratu Seba i alusna didok ma, ‘Najolo, ndang porsea ahu tu hata ni halak taringot ho. Alai saonari porsea do ahu, umpistar do ho sian na hea hubege. Sai dipasu-pasu Jahowa Debatami ma ho.’ Marlas ni roha do halak Israel di tingki i. Alai ndang sadia leleng, muba do i.