Ilyo Solomone ali imfumu mu Israele, Yehova amwipwishe ati: ‘Finshi ulefwaya inkupeele?’ Solomone ayaswike ati: ‘Ndi mwaice, nshaishiba ifya kuteka. Napapaata mpeleni amano aya kusunga bwino abantu benu.’ Yehova amwebele ati: ‘Apo walomba amano, nkakulenga ukabe uwa mano sana ukucila bonse aba pa calo. Nkakupeela ne fyuma, kabili nga wakulacita ifyo nakulakweba, tawakafwe bwangu.’

Solomone alitendeke ukukuula itempele. Abomfeshe golde iisuma sana, silfere, ifimuti e lyo na mabwe. Abaume na banakashi abengi sana abaishibe imilimo e babombele umulimo wa kukuula no kupanga ifipe fya pe tempele. Bapwile ukukuula itempele pa numa ya myaka 7 kabili balilipeele kuli Yehova. Pe tempele pali iciipailo, kabili pa ciipailo balibikilepo amalambo. Solomone alifukeme pa ntanshi ya ciipailo no kupepa ati: ‘Mwe Yehova, ili tempele linono icine cine kabili te lisuma sana kuli imwe, lelo muleumfwa nga twapepa kabili mulekutika amapepo yesu.’ Bushe Yehova aumfwile shani pe tempele bamukuulile na pe pepo Solomone apepele? Ilyo fye Solomone apwishishe ukupepa, umulilo wafumine ku muulu no koca umutuulo uwali pa ciipailo. Yehova alitemenwe itempele bamukuulile. Ilyo abena Israele bamwene ifyacitike, balitemenwe sana.

Abantu bonse mu Israele e lyo na ba ku fyalo fimbi baishibe Solomone ukuti aali ni mfumu ya mano sana. Abantu baleya kuli Solomone pa kuti abafwe ukupwisha amafya balekwata. Nangu ni namfumu wa ku Sheba na o alile kuli Solomone kabili alimwipwishe ifipusho ifyakosa. Ilyo aleumfwa ifyo Solomone aleyasuka, atile: ‘Ilyo banjebele ukuti uli wa mano, nshasumine, nomba nimona ukuti walikwata amano ukucila na pa fyo abantu banjebele. Lesa obe Yehova alikupaala.’ Abena Israele baleikala bwino sana kabili bali ne nsansa. Lelo ifintu fyali no kwaluka.