Fafisu Salomo ḇye raja Israel kwar, Yahwe ifuken i, ’Rosai wamarisen fa yaḇuk ḇe au ya?’ Salomo doḇe, ’Ayama yababo kaker ma yafawi roioḇa. Wafnoḇek aya kada fa yafawi nanem insama yafarkin pyum kawasa Besi.’ Yahwe ikofen, ’Snar wor fa wafawi nanem, nari yafrur au fa wafawi nanem syadi ro snonkaku ḇero supswan sya. Nari yafrur kako fa nwa nana arasai nabor kaku. Ma wasouser faro Aya ido, nari wakenem kawane.’

Salomo ḇyawes randak bait kuker brawen, sarak, aimun, ma karui ḇekakurna. Snon ma bin ḇekir sya sisya sesyaran ḇeḇawes bait ani. Swaf taun rifik ramnai, bait ani sḇawes i fa ibro ma sḇuk i ḇe Yahwe. Ro bait, sfasos farsarser ro rokef farsarser boya. Salomo ḇyansuba ro ḇarpon ya ma ḇyenadi, ’Sye Yahwe yo, bait ine iba mankunḇa ma ipduk mankunḇa faro Au, ḇape iḇye kada wamarisen faro samsyom nkoḇena ma rwower nadi nkoḇena.’ Yahwe imarisen faro bait ani ma Salomo nadi ḇyeja ke? Kero fafisu Salomo ḇyenadi raposa, for ḇesabuker nanki ya ikunpres farsarser ḇero rokef farsarser anna kam. Ine kyurfasnai Yahwe imarisen faro bait anya. Fafisu snonkaku Israel sya smam roi ine, siryaḇ kaku.

Snar fawawi nanem ḇyena, Raja Salomo sifawi i ro sup Israel ḇesiper isof ro moḇ-moḇ ḇebinkwan na. Ono ḇesmai samswen ido, srama fa sor fafnoḇek ro i. Iba syadi Ratu Syeba kako ryama fa ifuken sas i kuker fakfuken ḇesamswen na. Rofyor ryower Salomo kankarem ḇyena, ikofen ḇo doḇo, ’Fafisu iwara yarower fawar ḇekur au mboi yakyar ḇa. Kirine insape yamam ro mankundaya boi wafawi nanem syadi ro roi sfawarna. Allah bedi, Yahwe, ḇyeḇok au kwar.’ Fafisu anya, snonkaku Israel syakam sna aski kaku.  Ḇape, fyoro werḇa nane na neḇefadwer.