Éyoñ Salomon a nga taté na a jôé, Yéhôva a nga sili nye na: ‘Wo yi na me ve wo jé?’ Ane Salomon a nga jô na: ‘Me ne mone mongô, a me nji yeme jam ma bo. Éngôngo te, va’a ma fe’e ya yeme ba’ale ayoñe dôé.’ Nde Yéhôva a nga jô nye na: ‘Amu wo te ja’é fek, ma ye bo na ô bo nyô a dañe fe’e si nyô. Ma ye fe ve wo abui akum. Nge ô bo ma mewôk, wo ye nyiñ ayap.’

Ane Salomon a nga taté na a lôñe temple. A nga belane or, argent, a mekok. Betoyini befam a binga be mbe be yeme’e ésaé, mbe be nga lôñe temple. Temple a nga mane lôñeban mvuse mimbu zangbwal. A mbe a bili autel, vôme bôte be mbe be di’i metuna’a. Ane salomon a nga tebe asu autel a ye’elan, a jô’ô na: ‘A Yéhôva, temple nyi a nji bo étua anen nge étua abeñ asu dôé; ve, éngôngo, kañese’e ékaña’a jangan, a vô’ôlô’ô nja’a meye’elane mangan.’ Ye Yéhôva a nga vô’ôlô Salomon? Nné ane a nga mane ye’elan, nduan é nga so yôp a di’i metuna’a me mbe autel. Yéhôva a nga wô’ô fo’o temple ate mvaé. Éyoñ bon b’Israël be nga yene jam ete, be nga vak.

Salomon ve zu wum; ja’a bôte be mbe minlam mi mbe ôyap be nga wô’ô be kobô’ô ajô fe’e jé. Bôt be mbe be za’a nye yene na a kôme mejô map. Ja’a njô minga ya Séba a nga zu ve’ele nye a minsili mi mbe ayaé. Éyoñ a nga wô’ô biyalane bi Salomon, a nga jô na: ‘Me mbe me buni’i na bôt ba beté ôdo’é, ve éyoñe ji, me lôô na ô ne fek adañ abim be nga kate ma. Yéhôva Zambe a botaneya fo’o wo.’ Bone b’Israël be mbe be nyiñe mvo’é éyoñ éte, a be mbe meva’a été. Ve mam me nga su’ulane tyendé.