Dan le urúeihali Salomón Ísüraeli, aba lálügüdüni Heowá: “Ka babusenrubei níchugun bun?”. Lariñaga Salomón lun: “Nibureingidina ani ibidiñegili nun kaba lan nadüga, ruba lichú aau nun lun nóunigiruniña bumutuniña”. Ábati lariñagun Heowá lun: “Kei aba lan bamuriahan lichú aau numa, nadüga lun chútima lan bau sügǘ hau amu gürigia ubouagu. Nadüga giñe lun gibe lan irisini buma ani ánhabu gaganbadi nun migifebei bibagari”.

Aba lagumeserun Salomón adügoun ténpulu. Yúsuti golu, pülata, fulansu luma dübü. Sun katei le lídangiñeti létima buídubei. Nadagimeintiña saragu milu wügüriña hama würiña benefatiña adügoun ténpulu. Lárigiñe sedü irumu, aranseeru meha ténpulu lun tederegerún lun Heowá. Ábati híchugun adagaragüdüni ligibuagu latarü. Aba láhuduragun Salomón ligibugiñe latarü, ábati lafurieidun: “Heowá, lóuguati tueirin luma tubuidun ténpulu to bun, íbini ítara, resibibéi wáhuduragun ani aganbabéi wafurieidun”. Ka lasaminarubei Heowá tuagu ténpulu luma luagu lafurieidun Salomón? Kei lagumuchuni Salomón lafurieidun, aba liabin watu gemeti siélugiñe, ábati láguduni adagaragüdüni le luágubei latarü. Arufudati lira gunda lan Heowá tau ténpulu. Dan le harihinbalin ísüraelina lira, aba hagundaarun.

Aganbahóuati meha luagu lichú lau urúei Salomón lidan sun Ísüraeli luma lidan burí fulasu díseti. Ñǘbuintiña gürigia lun Salomón lun líderaguniña aranserei haturóbulin. Íbini lurúeite Sabá ñǘbuintu lun tóuchaguni lau burí álügüdahani le hénrenguti. Dan le taganbuni lóunabun, aba tariñagun: “Mafiñentina meha luagu le hariñagubei gürigia nun buagu, guenlé ariha naali wéiritima lan lichú bau sügǘ lau le hariñagubei. Biní láadibu Heowá le Bubungiute”. Buíduti meha habagari ísüraelina ani gúndaatiña. Gama lumoun, lasansira meha katei.