Muze Solomone hapwa mwanangana mu Izalele, Yehova yamuhula ngwenyi: ‘Yika unazange hanga ngukwehe?’ Solomone yamba ngwenyi: ‘Ami nguchili mukweze, kuchanyingikine yize mungulinga. Lisesa, ngwehe mana hanga nguhase kufunga atu je.’ Yehova yamba ngwenyi: ‘Amu wangwita mana, mungukupwisa mukwa-mana hano hashi. Nawa mungukwaha upite unji. Nyi wangwononokena, mukatwama miaka yinji.’

Solomone yaputuka kutunga Tembele. Iye kazachishile oru, prata, mapaya ni mawe. Tununu twa malunga ni mapwo waze te akwete utotombo kakwashile kutunga tembele. Muze hikwapalika miaka shimbiali, tembele yiyihwa nawa yayihana kuli Yehova. Kaselemo chilumbilo, nawa hapwile milambu. Solomone yafulamana kulutwe lia chilumbilo ni kulemba ngwenyi: ‘Mwene Yehova, tembele yino kuyatohele chinji hanji kupema chinji ku meso je, alioze lisesa, tayiza kama uwayilo wetu ni yilemba yetu.’ Kuchi Yehova evwile ha kulemba cha Solomone ni tembele? Muze Solomone ahwishile kulemba, susumuku, kahia yikakatuka mu malilu ni kwocha milambu yize te yili ha chilumbilo. Yehova yasolola ngwenyi, katayijile tembele. Muze A-Izalele achimwene, yawahilila chinji.

Mwanangana Solomone te kamunyingika chinji kuli A-Izalele ni kuli atu amu yifuchi yikwo mumu lia mana jenyi. Atu kapwile ni kwiza kuli Solomone hanga aakwase ku milonga yo. Chipwe mwazovu waku Shipa yeza kuli Solomone hanga eseke mana jenyi ni yihula yikalu chinji. Muze evwile makumbululo jenyi, yamba ngwenyi: ‘Ami kuchakapwile ni kutayiza yize te atu akungulweza hali yena, haliapwila mba hi nanyingika ngwami wahiana yize atu akungulweza. Zambi ye Yehova, akuwahise.’ Mwono wa atu eswe mu Izalele wapwile upema nawa atu katwamine kawape. Alioze yuma te muyalumuka.