Solomani siginin kɔ masaya la Israɛl, Jehova y’a ɲininga ko: ‘I b’a fɛ n’ ka mun lo di i ma?’ Solomani ko: ‘Ne ye denmisɛn ye, n’ tɛ koo lɔn. Sabari ka hakilitigiya di n’ ma walisa n’ ka se k’i ka jama mara.’ Jehova ko: ‘Komi i ye hakilitigiya lo deli nka i ma nafolo deli, ne bena i kɛ hakilitigi ye min ɲɔgɔn tɛ yen dugukolo kan. N’ bena i kɛ nafolobatigi ye fana. N’i ye mɛnni kɛ ne fɛ, i bena sii jan sɔrɔ.’

Solomani y’a daminɛ ka batosoba lɔ. A y’a lɔ ni sanu ni warigwɛ ɲanamanw ani lɔgɔ ni kabakuru ɲanamanw ye. Cɛɛ ni muso setigi waa caaman ye baara kɛ ka batosoba lɔ. Saan 7 tɛmɛnin kɔ, batosoba lɔra ka ban. Sisan, a tun be se ka di Jehova ma. Sarakabɔlan tun b’a kɔnɔ ani sarakaw tun b’o kan. Solomani y’a kunbiri gwan duguma sarakabɔlan ɲɛfɛ ani ka Jehova deli ko: ‘Eh Jehova, batosoba nin man bon ten, ani a ma kɛ ko a cɛ ka ɲi kojugu i ɲɛɛ kɔrɔ, nka sabari ka sɔn an ka batoli ma ani k’an ka deliliw lamɛn.’ Jehova ye mun lo miiri batosoba ani Solomani ka delili koo la? Solomani ka delili bannin kɔ dɔrɔn, tasuma bɔra sanfɛ ka jigi sarakabɔlan kan ani ka sarakaw jɛni. Jehova sɔnna batosoba ma. Israɛldenw y’o koo ye minkɛ, u ninsɔn diyara.

Solomani tun lɔnnin lo Israɛl jamana na ani yɔrɔjanw yɛrɛ la a ka hakilitigiya kosɔn. Mɔgɔw tun be na u ka kunkow ɲɛfɔ Solomani ye walisa a k’u dɛmɛ. Hali Seba masamuso nana ɲiningali gwɛlɛw kɛ a ye walisa k’a kɔrɔbɔ. A ye Solomani ka jaabiliw mɛn minkɛ, a ko: ‘U tun ye min fɔ n’ ye i koo la, ne tun ma la o la. Nka sisan, ne y’a faamu ko i ka hakilitigiya tɛmɛna mɔgɔw ka fɔta yɛrɛ kan. I ka Ala Jehova y’i duga.’ Israɛldenw ka ɲɛnamaya tun ka di, u tun be hɛɛrɛ la. Nka koow tun tɛna mɛɛn ka yɛlɛma.