Ni sa tui Isireli o Solomoni, e tarogi koya o Jiova: ‘Na cava o vinakata meu solia vei iko?’ E sauma o Solomoni: ‘Au se gone qai lailai na ka au kila. Au kerea na vuku meu lewai ira vinaka kina na nomuni tamata.’ E kaya o Jiova: ‘Ni o kerea na vuku, au na vakavuna mo vuku duadua e vuravura. Au na vakavutuniyautaki iko tale ga. O na bula balavu ke o talairawarawa vei au.’

E qai tara o Solomoni na valenisoro. E vakayagataka na koula, siliva, kau, kei na vatu vinaka duadua. Era tara na valenisoro e levu na turaga kei na marama era kenadau. Oti e vitu na yabaki, sa vakarau vakatabui me nei Jiova. E tiko kina e dua na icabocabonisoro, e tu e delana na isoro. E tekiduru ena mata ni icabocabonisoro o Solomoni me masu, e kaya: ‘Kemuni Jiova, sa rui lailai na valenisoro qo, e sega tale ga ni totoka me rauti kemuni, ia au kerea moni vakadonuya neimami sokalou, moni rogoca tale ga na neimami masu.’ Vakacava, a vakadonuya o Jiova na valenisoro kei na masu i Solomoni? Ni masu oti ga, e lutu mai na bukawaqa qai yameca na isoro. E vakadonuya gona o Jiova na valenisoro. Dua na ka nodra marau na Isireli nira raica qori.

E kilai levu na vuku nei Tui Solomoni e Isireli kei na veivanua yawa. Levu era lai raici koya me vukei ira ena nodra leqa. E lako tale ga na ranadi ni Sipa me vakatovolei koya ena taro dredre. Ni rogoca na ka e tukuna o Solomoni, e kaya: ‘E donu vinaka na itukutuku au rogoca me baleti kemuni, au sa qai vakadinadinataka ni oni sa rui vuku. E vakalougatataki kemuni o Jiova na nomuni Kalou.’ E totoka na bula e Isireli, dua na ka na nodra marau. Ia sa vakarau veisau na ituvaki.