Suleimani atuĩka Mũthamaki wa Isiraeli, Jehova aamũririe ũũ: ‘Ũkwenda ngũhe kĩĩ?’ Suleimani akĩmwĩra: ‘Ndĩ mũnini na ndiũĩ ũrĩa njagĩrĩirũo nĩ gwĩka. Ndagũthaitha ũhe ũũgĩ nĩguo hote kũrũmbũiya andũ aku.’ Nake Jehova akĩmwĩra ũũ: ‘Tondũ wahoya ũũgĩ, ngũtũma ũtuĩke mũndũ ũrĩa mũũgĩ mũno thĩinĩ wa thĩ. Ningĩ nĩ ngũkũhe ũtonga mũingĩ mũno. Na angĩkorũo nĩ ũrĩnjathĩkagĩra, nĩ ũgũtũũra mĩaka mĩingĩ.’

Suleimani nĩ aambĩrĩirie gwaka hekarũ. Aahũthĩrire thahabu ĩrĩa njega, betha, mbaũ, na mahiga. Athuri na atumia aingĩ maarĩ na ũũgĩ ũtiganĩte nĩ maarutire wĩra wa gwaka hekarũ. Thutha wa mĩaka mũgwanja, hekarũ nĩ yarĩkire na ihinda rĩarĩ ikinyu rĩa kũmĩamũrĩra Jehova. Yarĩ na kĩgongona kĩaigĩrĩirũo indo cia kũruta magongona. Suleimani aaturirie maru mbere ya kĩgongona kĩu akĩhoya ũũ: ‘Jehova, hekarũ ĩno ti nene kana ĩgathakara mũno harĩ we, no ndagũthaitha wĩtĩkagĩre ũthathaiya witũ na ũkaigua mahoya maitũ.’ Jehova onaga hekarũ na mahoya ma Suleimani atĩa? Suleimani aarĩkia kũhoya, mwaki woimire igũrũ na ũgĩcina magongona marĩa maarĩ kĩgongona-inĩ. Jehova nĩ eetĩkĩrire hekarũ ĩyo. Rĩrĩa Aisiraeli monire ũguo nĩ maakenire mũno.

Mũthamaki Suleimani nĩ oĩkaine Isiraeli guothe na kũndũ kũngĩ kũingĩ nĩ ũndũ wa ũũgĩ wake. Andũ nĩ maathiaga kũrĩ we nĩguo amahe ũtaaro wĩgiĩ mathĩna mao. Nginya mũtumia ũrĩa warĩ mũthamaki wa Sheba nĩ aathiire kũmũgeria na ciũria nditũ. Rĩrĩa aaiguire macokio make oigire ũũ: ‘Ndiretĩkĩtie ũrĩa ndĩrerĩtwo nĩ andũ, no rĩu nĩ ndona o na wĩ na ũũgĩ mũingĩ kũrĩ ũrĩa maroigĩte. Jehova Ngai waku nĩ akũrathimĩte.’ Ũtũũro warĩ mwega mũno harĩ rũrĩrĩ rwa Isiraeli na andũ maarĩ na gĩkeno mũno. No maũndũ maarĩ hakuhĩ gũcenjia.