Afta we Sɔlɔmɔn dɔn bi di kiŋ na Izrɛl, Jiova aks am se: ‘Wetin yu want fɔ mek a gi yu?’ Sɔlɔmɔn se: ‘A yɔŋ, ɛn a nɔ no wetin a de du. Duya gi mi sɛns fɔ mek a kia fɔ yu pipul dɛn.’ Jiova tɔk se: ‘Bikɔs yu se mek a gi yu sɛns, a go mek yu gɛt sɛns pas ɔlman na di wɔl. A go mek yu jɛntri bak. Ɛn if yu obe mi, yu go gɛt lɔng layf.’

Sɔlɔmɔn bin bigin fɔ bil di tɛmpul. I yuz silva, wud, ston, ɛn gold we fayn pas ɔl. Bɔku bɔku man ɛn uman dɛn we sabi fɔ du dɛn wok bin ɛp fɔ bil di tɛmpul. Afta sɛvin ia, dɛn bin dɔn fɔ bil di tɛmpul fɔ gi am to Jiova. Sɔlɔmɔn bin mek wan ɔlta, ɛn animal dɛn fɔ sakrifays bin de de. Sɔlɔmɔn nil dɔŋ bifo di ɔlta ɛn pre se: ‘O Jiova, dis tɛmpul nɔ big ɔ rili fayn lɛk aw i fɔ de fɔ yu, bɔt duya tek wi sakrifays dɛn ɛn lisin to wi prea dɛn.’ Wetin Jiova bin tink bɔt di tɛmpul we Sɔlɔmɔn bin bil ɛn in prea? As Sɔlɔmɔn dɔn fɔ pre, faya kɔmɔt ɔp ɛvin ɛn bɔn di sakrifays dɛn we bin de na di ɔlta. Jiova bin gladi fɔ di tɛmpul. We di Izrɛlayt dɛn si dis, dɛn bin gladi.

Dɛn bin sabi Kiŋ Sɔlɔmɔn ɔlsay na Izrɛl ɛn ivin na fa fa ples dɛn fɔ di sɛns we i gɛt. Pipul dɛn bin de kam to Sɔlɔmɔn fɔ lɛ i ɛp dɛn wit dɛn prɔblɛm dɛn. Ivin di kwin na Shiba bin kam fɔ tɛst am wit at at kwɛstyɔn dɛn. We i yɛri Sɔlɔmɔn in ansa dɛn, i tɔk se: ‘A nɔ bin biliv wetin pipul dɛn bin tɛl mi bɔt yu, bɔt naw a dɔn si se yu gɛt sɛns pas wetin dɛn bin tɛl mi. Yu Gɔd, Jiova, dɔn blɛs yu.’ Layf bin gud fɔ di Izrɛlayt dɛn, ɛn dɛn bin gladi. Bɔt tin dɛn go bigin fɔ chenj.