Vava Solomo kakituka ntinu a Isaele, Yave wanyuvula vo: ‘Nki ozolele vo yavana?’ Solomo wavova vo: ‘I nleke kwame, mana ivanganga kizeye mo ko. Dodokolo, umpana e ngangu kimana yatoma lunga-lunga nkangu aku.’ Yave wavova vo: ‘Wau vo olombele ngangu, ikuvana ngangu zayingi, ke vekala muntu ko ova nza ofwanana yaku muna ngangu. Ikuvana mpe mavua mayingi. Avo undemvokele, mvu miayingi ozinga.’

Solomo wayantika tunga e tempelo. Wasadila wolo, palata, mabaya ye matadi masunda o wete. Ulolo wa akala ye akento akwa umbangu basalanga e salu kia tunga e tempelo. Vava vavioka mvu nsambwadi, e tempelo yafokoka yo sunzulwa kwa Yave. Mwakala ye ziku dia kelela yimenga. Solomo wafukama vana ntwal’a ziku yo samba kwa Yave vo: ‘E Yave, e tempelo yayi ke isundidi nene ko oku wina yovo sunda o wete, kansi, dodokolo tambulwila e nsambil’eto yo wá sambu yeto.’ Aweyi Yave kabadikila tempelo ye sambu kia Solomo? Vava Solomo kamanisa o samba, vana vau tiya twakulumuka kuna zulu yo yoka yimenga yawonso yakala vana ziku. Yave watonda e tempelo yayina. Vava Aneyisaele bamona e diambu diadi, bayangalala kikilu.

Solomo wa Ntinu wazayakana muna Isaele yawonso ye muna nsi zankaka mu kuma kia ngangu zandi. Wantu bayizanga kwa Solomo mu vava lusadisu muna mambu mabatokanesanga. Kana nkutu ntinu ankento a Seba wayiza kwa Solomo mu kuntonta ye yuvu yampasi. Vava kawá e mvutu za Solomo, wavova vo: ‘Kiakwikidinge ko mana wantu bampovesenge mu kuma kiaku, kansi owau, mbwene vo osundidi e ngangu lutila nkutu una bavovelenge. O Yave wa Nzambi aku usambwidi.’ E zingu kiambote bakala muna Isaele, o nkangu mpe mu kiese wakala. Kansi, kuna kwalanda e mambu masoba.