Sawˉlaꞈmonˍ Iˉsaˍreˍlaˆ chaw ve jawˇ mawˇ gʼa te peuˬ hkʼawꞈ nawˉ, Yaˬhoˉvaˬ yawˇ htaꞈ na piˇ ve, ‘nawˬ ngaˬ geh aˬ htoꞈ ma lawˬ gaˇ ve le?’ Sawˉlaꞈmonˍ kʼoˆ ve, ‘ngaˬ a shaꞈ i jaˇ sheˍ. Hkʼaˬ hkʼe gʼa te tuˬ ngaˬ maˇ shiˍ. Nawˬ ve chaw htaꞈ nyi haꞈ shaˉ gʼa tuˬ cuˇ yiˍ peꞈ laˇ˗oˆ.’ Yaˬhoˉvaˬ kʼoˆ ve, ‘nawˬ ngaˬ hkawˇ na yuˬ ve kʼo, nawˬ lehˬ co zuhˬ ha zuhˬ cawˬ tuˬ, leh paw sha la tuˬ bon maˇ lawˬ. Nawˬ cuˇ yiˍ htaꞈ lawˬ ve pa taw, shu aꞈ kehˉ cuˇ yiˍ cawˬ tuˬ ngaˬ piˇ laˇ tuˬ yoˬ.’

Sawˉlaꞈmonˍ Yaˬhoˉvaˬ ve bon yehˬ tanˬ te ve yoˬ. Shi, hpu, suhˆ leh haˉ pui daꞈ jaˇ ve htaꞈ leuˆ yuˬ ve yoˬ. Laꞈ shaˉ maˉ te cheuˬ jaˇ ve hawˉ hkʼaˆ leh yaˇ miˇ laiˉ gʼaˇ bon yehˬ te ve yoˬ. 7 hkʼawꞈ peuˬ hkʼawꞈ nawˉ, bon yehˬ te peuˬ leh Yaˬhoˉvaˬ htaꞈ chiˇ aꞈ piˇ ve yoˬ. Bon yehˬ awˬ baˬ hpawˇ lo tuˉ tanˇ kuiˬ teˇ maˬ cawˬ leh oˇ ve awˬ hkʼoˆ lo Sawˉlaꞈmonˍ hkui tcuhˉ teh leh bon lawˬ leh kʼoˆ ve, ‘Yaˬhoˉvaˬ˗o, nawˬ awˬ pon bon yehˬ chi maˇ uiˍ leh maˇ daꞈ. Yaꞈ hkʼaˇ, ngaˬ oˉ kʼoˍ pui ve htaꞈ haꞈ yuˬ laˇ leh ngaˬ ve bon lawˬ hkawˇ htaꞈ a ciˉ na laˇ˗oˆ.’ Yaˬhoˉvaˬ Sawˉlaꞈmonˍ ve bon lawˬ hkawˇ leh bon yehˬ chi ve htaꞈ hkʼaˬ hkʼe dawˇ ve le? Sawˉlaꞈmonˍ bon lawˬ peuˬ leh mvuhˇ naw ma hkʼoˆ lo aˬ miˍ ce yaꞈ la leh, tanˇ taˍ ve htaꞈ toꞈ baˬ sheˬ ve yoˬ. Yaˬhoˉvaˬ bon yehˬ chi htaꞈ haꞈ yuˬ ve tehꞈ Iˉsaˍreˍlaˆ chaw gʼa mawˬ htaˇ ha lehˬ jaˇ.

Iˉsaˍreˍlaˆ mvuhˇ miˬ hkʼa ti chi ti lo jawˇ mawˇ Sawˉlaꞈmonˍ cuˇ yiˍ cawˬ ve bvuhˬ kʼai ve yoˬ. Awˬ kaˍ awˬ nu ve mvuhˇ miˬ htawˇ awˬ lawn chi ve gʼa kaˇ ve yoˬ. Yawˇ hui ve awˬ lawn Sawˉlaꞈmonˍ gu laˇ tuˬ ca lawˬ la ve yoˬ. Sheˍbaˆ mvuhˇ miˬ ve jawˇ mawˇ ma Sawˉlaꞈmonˍ geh laˬ leh na hkawˇ haˍ jaˇ ve teˇ hpaˍ na piˇ ve yoˬ. Na piˇ taˍ ve htaꞈ hkʼawꞈ laˇ gʼa ve htaꞈ gʼa mawˬ leh yawˇ kʼoˆ ve, ‘awˉ lawˉ htaˇ nawˬ ve awˬ lawn gʼa kaˇ ve ngaˬ maˇ yonˍ. Yaꞈ hkʼaˇ, ngaˬ gʼa kaˇ ve aꞈ kehˉ nawˬ cuˇ yiˍ cawˬ jaˇ ve htaꞈ gʼa mawˬ ve yoˬ. Nawˬ ve Yaˬhoˉvaˬ Gʼuiˬ sha nawˬ htaꞈ awˬ bon naꞈ piˇ˗oˆ.’ Oˇ teˇ yanˇ Iˉsaˍreˍlaˆ mvuhˇ miˬ dawˇ sha gawˬ lehˍ ve cawˬ leh teˇ gʼaˇ le le ha lehˬ jaˇ. Yaꞈ hkʼaˇ, chi hkʼe tiˉ maˇ heˆ. Pa kʼai chehˇ ve yoˬ.