Apre ki Salomon ti vinn lerwa lor Izrael, Zeova ti demann li: ‘Ki to anvi mo donn twa?’ Salomon ti reponn: ‘Mo ankor zenn ek mo pena lexperyans. Silteple, donn mwa sazes pou diriz to pep.’ Lerla, Zeova ti dir li: ‘Parski to finn demann pou gagn sazes, mo pou fer twa vinn zom pli saz ki ena lor later. Mo pou osi fer twa vinn bien-bien ris. Ek si to obeir mwa, to pou viv lontan.’

Salomon ti koumans konstriksion tanp. Li ti servi pli bon kalite lor, larzan, pier, ek dibwa ki ti ena. Bann milye zom ek fam ki ti ena bann konpetans pou travay ti konstrir tanp. Apre set an, konstriksion tanp ti fini ek ti ariv ler pou ofer li Zeova. Ti met bann ofrand lor lotel tanp ek Salomon ti azenou devan lotel-la. Li ti priye: ‘A Zeova, sa tanp-la pa ase gran, pa ase zoli pou twa, me silteple, aksepte nou ladorasion ek ekout nou bann lapriyer.’ Ki Zeova ti panse lor tanp-la ek lor lapriyer Salomon? Deswit kouma Salomon ti fini so lapriyer, Zeova ti avoy dife depi lesiel pou bril bann ofrand ki ti lor lotel. Se koumsa ki Zeova ti montre ki Li ti bien kontan tanp-la. Kan bann Izraelit ti trouv sa, zot ti extra kontan.

Bann dimounn partou dan Izrael ek mem dan bann pei bien-bien lwin ti konn sazes Lerwa Salomon. Boukou dimounn ti vinn get Salomon pou ki li ed zot rezoud zot bann problem. Mem larenn Saba ti vinn teste Salomon. Li ti poz Salomon bann kestion difisil ek kan li ti tann so bann repons, li ti dir: ‘Mo pa ti krwar seki bann dimounn ti pe rakonte lor twa, me asterla mo’nn trouve ki to ena pli boukou sazes ki zot ti pe dir. To Bondie, Zeova, inn beni twa.’ Bann Izraelit ti pe amenn enn lavi trankil, ek zot ti ere. Me biento, sa ti pou sanze!