Ke Solomon ear jino kiiñ ioon armejin Israel, Jeova ear kajjitõk ippãn: ‘Ta eo kokõn̦aan bwe in lewaj ñan kwe?’ Solomon ear ba: ‘Ña ij l̦addik wõt, im ijjab jel̦ã ta eo in kõm̦m̦ane. Jouj im letok ñan ña mãlõtlõt bwe in jel̦ã lale armej ro am̦.’ Innem Jeova ear ba: ‘Kõnke kwaar kajjitõk bwe in lewaj mãlõtlõt, inaaj kõm̦m̦an bwe kwõn mãlõtlõt jãn aolep armej ro ioon lal̦. Inaaj bar kõm̦m̦an bwe kwõn m̦weiie. Ñe kwõnaaj pokake eõ, inaaj kõm̦m̦an bwe en aetok am̦ mour.’

Innem Solomon ear jino kalõk tampel̦ eo. Ear kõjerbal men ko rem̦m̦antata ãinwõt gold, jelba, al̦al̦ in wõjke, im dekã ko raorõk. Elõñ to̦ujin em̦m̦aan im kõrã ro jim̦or rekapeel rar jipañ kalõke tampel̦ in. Ãlikin 7 iiõ, rar pojakin ajel̦o̦k tampel̦ in ñan Jeova. Ear wõr juon lokatok ie im menin katok ko ioon. Solomon ear bukwelõlõ im̦aan lokatok eo, im ear jar im ba: ‘O Jeova, ejjab lukkuun l̦ap im aiboojoj tampel̦ in ñan kwe, ak kwõn jouj im roñjake jar ko ammim im en buñbũruom̦ kõn ammim kabuñ ñan kwe.’ Kar ta l̦õmn̦ak eo an Jeova kõn tampel̦ eo im jar eo an Solomon? Eokwe, m̦õjin wõt an Solomon jar, Jeova ear jilkintok juon kijeek jãn lañ ñan tile menin katok ko ioon lokatok eo. Ear kõm̦m̦ane men in ñan kaalikkar bwe ear m̦õn̦õn̦õ kõn tampel̦ eo. Ke RiIsrael ro rar loe men in, rar m̦õn̦õn̦õ im lañlõñ.

Kiiñ Solomon ear buñbuñ ilo aolepen Israel im ãne ko rettol̦o̦k kõn an mãlõtlõt. Elõñ armej rar itok ñan ippãn bwe en jipañ er kõn apañ ko aer. Joñan, lerooj eo jãn Shiba ear itok ñan ippãn bwe en kwal̦o̦k jet kajjitõk ko reppen ñan lale ewi joñan an mãlõtlõt. Ke lerooj in ej roñjake uwaak ko an Solomon, ear ba: ‘Iar jab tõmak men ko armej ro rar ba ñan ña kõn kwe, ak kiiõ ijel̦ã bwe el̦apl̦o̦k am̦ mãlõtlõt jãn joñan eo rar ba. Anij eo am̦, Jeova, en kõjeraam̦m̦an kwe.’ Ear lukkuun em̦m̦an mour ilo aelõñin Israel, im armej ro ie rar m̦õn̦õn̦õ. Bõtab tokãlik, aolep men kein renaaj kar oktak.