Kema Salomón pejki tlanauatia ipan Israel, Jehová kiiljuik: “¿Tlake tijneki ma nimitsmaka?”. Salomón kinankilik: “Na nojua nitelpokatl uan amo nijmati kenijkatsa nitlanauatis. Nimitstlajtlania xinechmaka tlalnamikilistli, kiampa kuali nikinyakanas motekipanojkauaj”. Jehová kiiljuik: “Nimitsmakas tlalnamikilistli, kej tinechtlajtlanijtok. Uan ipan nochi Tlaltipaktli amo aka tlalnamikis kej ta. Nojkia nijchiuas xitlatominpia, uan tlaj tinechneltokas tiitstos miak xiuitl”.

Salomón pejki kichijchiua nopa teokali. Kitekiuik tlen kuali oro, plata, kuauitl uan tetl. Tlauel miakej tlakamej uan siuamej katli kuali tekitiyayaj kichijchijkej nopa teokali. Kitlamichijchijkej ipan chikome xiuitl. Kema kimaktilijkej Jehová nopa teokali, kitlalijkej miak tlakajkaualistli ipan tlaixpamitl. Salomón motlankuaketski iixpa tlaixpamitl uan momaijtok, kiijtok: “ToTeotsij Jehová, maske ni teokali amo tlauel ueyi uan amo tlauel yejyektsi kej kampa ta kinamiki timitsueyichiuasej, timitstlajtlaniaj, xitechtlakakili kema timomaijtosej uan ma mitsyolpakilti kema timitsueyichiuasej”. ¿Kenijkatsa kiitak Jehová nopa teokali? ¿Kitlakakilik kema Salomón momaijtok? Kema Salomón tlanki momaijtoua, temok tlitl uan kitlatik nopa tlakajkaualistli tlen eltoya ipan tlaixpamitl. Kiampa Jehová kinextik kipaktik nopa teokali. Israeleuanij tlauel yolpajkej kema kiitakej tlen panok.

Salomón tlauel tlalnamikiyaya, yeka ipan nochi altepetl Israel kuali kiixmatiyayaj, uan nojkia ipan altepemej tlen uejka mokauayaya. Miakej maseualmej kionitayayaj pampa kinekiyayaj ma kinpaleui kisenkauasej ininkuesoljuaj. Nopa siuatlanauatijketl tlen Seba kiitato pampa kinekiyaya kitlajtlanilis tlamantli tlen ouij, uan kinekiyaya kiitas tlaj nelia tlauel tlalnamikiyaya. Kema kikajki kenijkatsa Salomón kinankilik, kiijtok: “Amo nijneltokayaya tlen sekinok kiijtouayayaj, uan nama nikita nelia tlauel titlalnamiki. MoTeotsij Jehová tlauel mitsteochijtok”. Maske ipan altepetl Israel nochi kuali itstoyaj uan nochi yolpakiyayaj, teipa ayokmo kiampa itstoskiaj.