Vaavaa Solomoni aakhanleiye mwene o Isarayeli, Yehova aalocano ariki: ‘Okiveke yeeyo onachunaawe, nave miyaano kinamoovaha.’ Solomoni aahaakhula: ‘Miyaano ka mmiravo ni oohisuwela, kinnoovekaani mukivahe miruku wi kisuwele owookolola achu anyu.’ Yehova aahi: ‘Woona wi okivenke miruku soosuwelano wookolola, kinamoovaha yeeyo okivenkaawe. Kinamoovaha tho muhakhu ni ovuwa otokotoko. Kinamwaaceererya tho mahiku a ekumi aa.’

Solomoni aapacerya oteka empa ya Yehova. Owo aapharihela ewooro eparata, ithaapwa ni maluku a esisapo yoowalamela. Achu ancipale—alopwana ni athiyana yaakhaviherya muteko wa oteka. Empa yaakwaaxeya ivinrevo iyaakha thanu napiili. Yaakhalano altare a mikucho. Solomoni aakokhora ohoolo wa altare nave aavekela: ‘Khwoo Yehova kinnoovekaani wi muwiriyaneke mavekelo ahu naamwi empa ela ehitempe wunnuwa naari oreera.’ Yehova onne hai vooloca sa empa nnivekelo na Solomoni? Arikimukwaaxaru ovekela, mooro waakhuruwa wirimu nave waasuka mukucho va altare. Yehova aasiveliwa ni empa ele. Vaavaa Aisarayeli yoonnaaya, yaatepa ohakalala.

Mwene Solomoni aatepa osuweliwa nthowa na miruku sawe. Achu yaanaya wa Solomoni wi ithorihiwe miyaha saya. Ophiyerya wi mwene a mwaamuthiyana o Sapa aarwa wi ampakele Solomoni makoho oovila. Vaavaa aawiriyanneiye waakhula wawe, owo aatikhina ni aloca: ‘Miyaano nkaawenrye weemererya ichu kaaleeliwaaka, nto vano kiruulaaka kohoona ni meetho aka. Apwiya Muluku aa evuwihiwe.’ Achu yaanahakalala nave yaanapuha okumi waphaama. Nyenya ohoolo waya ichu saatorokeya.